Astanada bes jasar bala oiyn alańynda toqqa túsip, jansaqtaý bólimine jetkizildi, dep habarlaidy dalanews.kz.
Halyqstan málimetinshe, oqiǵa A105 kóshesindegi №11 úidiń aýlasynda bolǵan. Turǵyndardyń aitýynsha, olar balalar alańynyń mańynan ótetin qaýipti elektr symy týraly qurylysshylarǵa birneshe ret eskertken. Alaida "Ǵalamat" qurylys kompaniiasynyń qyzmetkerleri kabeldi qaýipsiz jerge kóshirmei, ústine topyraq qana tósegen.
Qaiǵyly jaǵdaidyń aldyndaǵy túni symnan ushqyn shyqqanyn da turǵyndar baiqaǵan. Soǵan qaramastan, jaýapty tulǵalar tarapynan eshqandai shara qoldanylmaǵan.
Jeksenbi kúni tústen keiin osy mańda oinap júrgen bes jasar Nurasyldy toq soqqan. Bala kúiik alyp, aýrýhanaǵa jetkizildi.
Ata-anasynyń sózinshe, kabel jaqyn mańdaǵy qurylys nysanyna tartylǵan. Onyń birneshe tarmaǵy bolǵan, sonyń biri balalar oiyn alańynyń ústimen ótken. Symnyń bir bóligi ashyq jatqan.
"Qurylysshylarǵa bul týraly qansha ret aittyq. Biraq bizdi eshkim tyńdamady", - deidi balanyń anasy Uljan.
Oqiǵadan keiin elektr jelisi ajyratylyp, kabelge mór basylǵan. Uljannyń aitýynsha, symnyń bir bóligi saraptamaǵa jiberilgen. Bul rásimge qurylys kompaniiasynyń ókilderi de qatysqan. Alaida anasynyń sózinshe, "Ǵalamat" kompaniiasynyń basshylyǵy bolǵan jaǵdaiǵa qatysty áli pikir bildirmegen.
Astana qalasynyń Qoǵamdyq densaýlyq saqtaý basqarmasy Nurasyldyń №2 qalalyq balalar aýrýhanasynda jatqanyn habarlady. Dárigerler onyń jaǵdaiyn aýyr, biraq turaqty dep baǵalap otyr. Al Uljan balasynyń densaýlyǵyna qatysty tolyq aqparat ózine de berilmei jatqanyn aitty.
Qolda bar málimetke súiensek, oqiǵaǵa bailanysty Qylmystyq kodekstiń 306-baby, iaǵni tutynýshylardyń ómiri men densaýlyǵyna qaýipsizdik talaptaryna sai kelmeitin jumystardy oryndaý nemese qyzmet kórsetý deregi boiynsha qylmystyq is qozǵalǵan.
