Senat tóraǵasy Máýlen Áshimbaev aldaǵy qyzmeti týraly suraqqa jaýap berip, qai qyzmette bolsa da Memleket basshysy belgilegen reformalardy júzege asyrýǵa úles qosa beretinin aitty, dep habarlaidy dalanews.kz.
Onyń aitýynsha, qazirgi kezeńde eldiń damýy úshin qoǵamnyń birigýi jáne reformalardy júieli túrde jalǵastyrý asa mańyzdy.
«Qai qyzmette bolsam da Memleket basshysy belgilegen maqsattardy júzege asyrý jolynda jumysymdy jalǵastyramyn. Ádiletti Qazaqstandy qurýǵa, elimizdegi reformalar kún tártibin iske asyrýǵa óz úlesimdi qosa beremin. Qazaqstannyń turaqty ári teńgerimdi damýyna, elimizdiń tabysty, órkendegen, bolashaǵy zor, áleýmettik jáne demokratiialyq memleketke ainalýyna úles qosýǵa bar kúshimdi salamyn», – dedi Máýlen Áshimbaev Senat kýlýarynda.
Senat spikeriniń pikirinshe, Qazaqstanda atqarylatyn jumys áli de kóp. Sonyń ishinde Prezident bastamashy bolǵan reformalardy tolyq júzege asyrý basty mindetterdiń biri bolyp qala beredi.
«Prezidentimiz bastamashylyq etken reformalar Qazaqstanǵa qajet ekenine shyn senemin. Sol reformalardy tolyq júzege asyrýymyz kerek. Memleket basshysynyń bastamalary men jańǵyrý kún tártibiniń tóńireginde birigýimiz qajet. Osy turǵydan alǵanda, men de Prezidenttiń reformalaryn iske asyrýǵa barynsha paidaly bolýǵa tyrysamyn. Qazir bárimiz birigip, jumyla jumys isteitin kezeń. Elimiz úlken emes, sondyqtan árqaisymyz Ádiletti ári progressivti Qazaqstandy qurý jolynda eńbek etýimiz kerek. Atqarylatyn jumys óte kóp», – dedi ol.
Eske salaiyq, 29 maýsymda Senat sońǵy otyrysyn ótkizdi. Qoldanystaǵy Konstitýtsiiaǵa engizilgen ózgeristerge sáikes, 1 shildeden bastap jańa konstitýtsiialyq model kúshine enedi. Al Ulttyq quryltaidyń jańa quramyn sailaý tamyz aiynda ótedi.
