AQSh Iranǵa qarsy jańa sanktsiialar engizýge daiyndalyp jatyr. Vashingtonnyń sharalary Iranmen saýda jasaityn elder men kompaniialarǵa da baǵyttalýy múmkin, dep habarlaidy dalanews.kz.
Reuters málimetinshe, AQSh Qarjy ministri Skott Bessent Vashington Iranǵa qarsy «tarihtaǵy eń qatań sanktsiialardy» engizetinin málimdegen. AQSh biligi bul arqyly Tegerannyń munai eksporty men halyqaralyq saýdasyna qysym jasaýdy kózdep otyr.
Qytai Syrtqy ister ministrliginiń ókili Go Tsziakýn Beijiń AQSh-tyń jańa sanktsiialaryn muqiiat baqylaitynyn jáne óz quqyqtary men múddelerin qorǵaý úshin qajetti sharalardy qabyldaitynyn aitty. Qytai buǵan deiin de AQSh-tyń birjaqty sanktsiialaryna qarsylyq bildirgen.
Reuters dereginshe, Qytai Iran munaiynyń negizgi satyp alýshysy bolyp otyr. 2025 jyly Qytaiǵa Irannan táýligine orta eseppen 1,4 mln barrel munai jetkizilgen. Alaida AQSh-tyń qysymynan keiin bul kórsetkish tómendei bastaǵan.
Vashingtonnyń jańa sharalary Irannyń munaiyn satyp alatyn qytailyq kompaniialarǵa da áser etýi múmkin. AQSh buǵan deiin Iran munaiyn satyp alǵan birneshe qytailyq munai óńdeý kásiporny men tasymaldaýshy kompaniialarǵa sanktsiia engizgen.
Iran biligi AQSh-tyń jańa sanktsiialaryn aiyptap, Vashingtonnyń qysymy nátijesiz bolatynyn málimdedi. Tegeran sondai-aq sanktsiialarǵa jaýap berýge daiyn ekenin eskertti.
Jaǵdai Ormýz buǵazyndaǵy shielenis kúsheiip turǵan kezde ýshyǵyp otyr. Bul teńiz joly arqyly álemdik munai saýdasynyń eleýli bóligi ótedi. Iran buǵazdaǵy qozǵalysty shekteý qaýpin birneshe ret aitqan.
Reuters málimetinshe, jańa sanktsiialardyń naqty tizimin AQSh Qarjy ministrligi búgin jariialaýy múmkin. Vashingtonnyń sheshimi AQSh pen Qytai arasyndaǵy qarym-qatynasqa jáne álemdik munai naryǵyna qosymsha qysym túsirýi yqtimal.
