AQSh Iranǵa qarsy «tarihtaǵy eń qatań sanktsiialardy» engizýge daiyndalyp jatyr. Vashington bul sharalar arqyly Tegeranǵa ekonomikalyq qysymdy kúsheitip, Iran úkimetin álsiretýdi kózdep otyr, dep habarlaidy dalanews.kz.
Reuters málimetinshe, AQSh Qarjy ministri Skott Bessent jańa sanktsiialar Iranǵa qarsy áskeri operatsiialardy odan ári keńeitý qajettiligin azaitýy múmkin ekenin málimdedi. Onyń aitýynsha, Vashington Iranǵa qarsy teńiz blokadasymen qatar ekonomikalyq qysym tetikterin de qoldanady.
Bessent AQSh-tyń Iranmen saýda jasaityn nemese oǵan ekonomikalyq qoldaý kórsetetin basqa memleketterge de qysym jasaitynyn eskertti. Vashington ásirese Qytaidyń Iran munaiyn satyp alýyna alańdap otyr. Reuters dereginshe, Qytai Iran eksportynyń 80%-dan astamyn satyp alady.
AQSh prezidenti Donald Tramp buǵan deiin Iranǵa «kez kelgen kómek» kórsetetin elder ekonomikalyq saldarǵa tap bolatynyn eskertken. Osylaisha Vashingtonnyń jańa sanktsiialary Irannyń ózimen ǵana shektelmei, onymen saýda jasaityn sheteldik kompaniialar men memleketterge de áser etýi múmkin.
Iran bul jospardy qatań synǵa aldy. Iran Syrtqy ister ministrligi AQSh sanktsiialaryn «ekonomikalyq terrorizm» jáne adamzatqa qarsy qylmys dep atady. El parlamentiniń tóraǵasy Muhammed Baqer Qalibaf Tegeran jańa sanktsiialarǵa tótep berý úshin ekonomika men qaýipsizdik sharalaryn kúsheitýi qajet ekenin málimdedi.
Qytai da Vashingtonnyń ustanymyn qoldamady. Beijiń sanktsiialar máseleni sheshýge kómektespeitinin aityp, AQSh-ty diplomatiialyq jol izdeýge shaqyrdy.
Reuters málimetinshe, Bessent jańa sanktsiialardyń naqty mazmunyn dúisenbi kúni jariialamaq. Bul sharalar Irannyń munai eksportyna, qarjy operatsiialaryna jáne halyqaralyq saýda arnalaryna baǵyttalýy múmkin.
Jańa sanktsiialar týraly málimdeme Ormýz buǵazy mańyndaǵy jaǵdai shielenisip turǵan kezeńde jasaldy. Buǵaz arqyly álemdik munai tasymalynyń eleýli bóligi ótedi. Iran munaiynyń Qytaiǵa jetkizilýiniń azaiýy qazirdiń ózinde naryqtaǵy usynysqa áser etip, munai baǵasynyń ósýine yqpal etip otyr.
Osylaisha AQSh Iranǵa qarsy áskeri qysymmen qatar ekonomikalyq oqshaýlaýdy kúsheitýge kóship jatyr. Alaida Tegeran sanktsiialarǵa berile qoimaitynyn málimdep, Vashingtonnyń qysymyna jaýap berýge daiyn ekenin kórsetýde.
