Aqmola oblysynyń turǵyny aýdandyq emhana dárigerleriniń der kezinde durys diagnoz qoia almaýynan densaýlyǵyna ziian kelgenin dáleldep, sot arqyly 1,6 million teńge kóleminde ótemaqy óndirip aldy, dep habarlaidy dalanews.kz.
Sot málimetinshe, 2025 jyldyń shilde aiynda mehanizator bolyp jumys isteitin Aqmola oblysynyń turǵyny Tselinograd aýdandyq emhanasyna bas aýrýy, jótel, murynnan sý aǵý, dene qyzýynyń kóterilýi jáne iyq tusynyń aýyrýy siiaqty shaǵymdarmen júgingen.
Dárigerler oǵan bastapqyda:
- jedel respiratorlyq virýstyq infektsiia (JRVI),
- jedel nazofaringit,
- sozylmaly bronhittiń asqynýy,
- polisegmentarlyq pnevmoniia diagnozdaryn qoiǵan.
Birneshe kúnnen keiin naýqas qaitadan emhanaǵa kelip, qoly men iyq býynyndaǵy aýyrsyný men isinýge shaǵymdanǵan. Bul joly basqa dáriger oǵan «revmatoidty artrit» diagnozyn qoiyp, travmatologqa qaralýǵa keńes bergen. Al travmatolog iyq býyny bailamdarynyń sozylýy jáne shamadan tys kúsh túsýi degen qorytyndy jasaǵan.
Alaida arada bir apta ótkende er adam shuǵyl túrde Astana qalasyndaǵy aýrýhanalardyń birine jatqyzyldy. Onda dárigerler onyń sol jaq qolynda, jaýyryn ústi men asty aimaqtarynda flegmona paida bolǵanyn anyqtaǵan.
Saraptamalyq komissiianyń qorytyndysyna sáikes, aýdandyq emhana mamandary naýqasty tekserý men emdeý barysynda birqatar qatelik jibergen. Sottyń baspasóz qyzmetiniń habarlaýynsha, sarapshylar diagnozdyń kesh qoiylǵanyn, zertteý nátijeleri men taldaýlardyń eskerilmegenin anyqtaǵan. Sonyń saldarynan gematoma paida bolyp, flegmona damyǵan, naýqasqa ota jasaýǵa týra kelgen jáne iyq býynynyń qyzmeti buzylǵan. Sondai-aq komissiia meditsina qyzmetkerleriniń áreketi men patsienttiń densaýlyǵyna keltirilgen ziian arasynda tikelei sebep-saldarlyq bailanys bar ekenin atap ótken.
«Naýqastyń shaǵymdaryna tiisti deńgeide nazar aýdarylmaǵan, aýrý tarihy ústirt toltyrylǵan, qoiylǵan diagnoz tolyq bolmaǵan», – delingen sarapshylar qorytyndysynda.
Sot málimetine sáikes, durys qoiylmaǵan diagnoz ben tiimsiz emdeý saldarynan er adam uzaq ýaqyt eńbekke jaramsyz bolyp qalǵan. Osyǵan bailanysty sot talap aryzdy ishinara qanaǵattandyryp, meditsinalyq mekemeden patsienttiń paidasyna 1,6 million teńge kóleminde moraldyq ziian ótemaqysyn óndirip berý týraly sheshim shyǵardy.
