Amanat partiiasy depýtatynyń firmasy Atyraý oblysynda 141 tenderdi jeńip, 15 milliard teńgege memlekettik kelisimsharttar alǵan. Májilis depýtaty Ádil Jubanov quryltaishy bolyp tabylatyn “BatysAliansStroi” kompaniiasy 2016 jyldan beri Atyraý aýmaǵynda sumdyq belsendilik tanytýda. Kelisimsharttardyń basym bóligi Atyraý oblysyndaǵy qala qurylys basqarmasy men túrli aýdandyq ákimdiktermen jasalǵan, dep habarlaidy Dalanews.kz DALA INSIDE arnasyna silteme jasap.
Derekkóz málimetinshe, qazirgi tańda firmany esim-soiy men ákesiniń aty sáikes keletin Janabai Jubanov basqaryp otyr.
"Árine, Májilis depýtatynyń ózi biznes basqara almaidy. Jaqyn týysyna berip qoiady. Biraq tutastai alǵanda báribir onyń bedeli, tanystyǵy, sózi biznestiń júrýinde úlken ról oinaidy. Qazir Antikor depýtattardyń biznesin, júris-turysyn bir kózimen baqylap otyr. Ádil Jubanov erekshe monitoringke áldeqashan ilingen", - deidi, DALA INSIDE derekkózi.
Arna usynǵan aqparatqa súiensek, bolashaqta Májilis depýtattarynyń biznesine aýdit júrýi múmkin.
“Qazir mundai ideia Úkimet qabyrǵasynda beiresmi talqylanýda. Sebebi, Parlament qabyrǵasynda júrgen halyq "qalaýlylarynyń" basym bóliginiń artynda biznes bar. Birer jyl buryn, depýtattardyń jalaqysynyń ósýine moratorii jariialanǵany este. Biraq jalaqymen kún kórip júrgen bir de bir depýtat baiqalmaidy”, — deidi DALA INSIDE telegram arnasy.
Ásirese Amanat partiiasynyń depýtattary bilikke jaqyndyǵyn alys óńirlerde tynysh monetizatsiialap jatqany týraly az aitylyp júrgen joq. Endi keshendi tekseris bastalýy múmkin.
Eske salaiyq, buǵan deiin Májilis depýtaty Ádil Jubanov "Samuryq-Qazyna" ulttyq ál-aýqat qoryn qatań synǵa alǵan edi. Sársenbi kúni ótken Májilis otyrysynda depýtat qordyń ekonomikalyq damýǵa kedergi keltirip otyrǵanyn málimdedi.
"Basqarý men satyp alýdaǵy júielik teńgerimsizdikter joiylmaiynsha, "Samuryq-Qazyna" ulttyq ál-aýqat qory ekonomikalyq damýdyń qozǵaýshy kúshi emes, tejegishi bolyp qala beredi", – dedi májilis depýtaty Ádil Júbanov sársenbi kúni ótken otyrysta.
Onyń aitýynsha, 2008 jyly qurylǵan bul qor bastapqyda daǵdarysqa qarsy saiasattyń strategiialyq institýty ári uzaq merzimdi ekonomikalyq ósýdiń draiveri retinde josparlanǵan.
"Alaida is júzinde qordyń qyzmeti qoǵamda ekonomikalyq tiimdiligi men ashyqtyǵy turǵysynan senimsizdik týdyryp otyr", – dep málimdedi Júbanov.
Depýtattyń aitýynsha, qor quramyndaǵy kompaniialar naryqtyq ekonomikaǵa belsendi aralasady, bul olardyń artyqshylyqty jaǵdaiymen bailanysty.
"Memlekettik satyp alýdyń biryńǵai elektrondyq bazasynyń málimeti boiynsha, 2024 jyly "Samuryq-Qazyna" tobynyń satyp alýlarynyń 60%-dan astamy bir kózden júzege asqan. Mundai tájiribe naryq qaǵidattaryna qaishy keledi jáne korrýptsiialyq táýekelderge jol ashady, monopoliiaǵa sebepker bolady", – dedi ol.
Depýtattyń aitýynsha, 2024 jyly Qazaqstan Transparency International uiymynyń jemqorlyqty qabyldaý indeksinde 180 eldiń ishinde 90-orynda tur.
Júbanovtyń sózine qaraǵanda, qordyń negizgi aktivteri – "QazMunaiGaz", "Qazaqstan temir joly", KEGOC – qarjylyq kórsetkishteriniń tómendeýine jáne qaryz júktemesiniń artýyna tap bolǵan. Sonymen qatar, aiqyn transformatsiia strategiialarynyń joqtyǵy da synǵa ilikken.
Ol "Samuryq-Qazynany" básekege qabiletti ekonomikany damytýǵa baǵyttalǵan, jeke sektor úshin tartymdy platforma retinde qaita qurýdy usyndy.
