Qazir Almatydaǵy shyǵaryndylary tómen aimaq (LEZ) tek pilottyq rejimde jumys istep tur. 2026 jyly 28 sáýirde iske qosylǵan tehnikalyq pilottyq joba jyl sońyna deiin jalǵasady. Bul týraly zań shyǵarý salasynyń sarapshysy, Almatynyń atmosferalyq aýasyn qorǵaý qaǵidalaryn ázirleý jónindegi jumys tobynyń jetekshisi Erlan Buzyrbaev aitty, dep habarlaidy dalanews.kz.
«Pilottyq rejimde avtokólikterdi mindetti túrde tehnikalyq tekserýden ótkizý, aimaqqa kirgeni úshin aqy alý, qozǵalysty shekteý nemese aiyppul salý qarastyrylmaǵan. Qazir avtokólik ieleriniń tehnikalyq tekserýden ótýi erikti. Al odan ótpeý eshqandai quqyqtyq saldarǵa ákep soqpaidy», – dedi ol.
Eske salaiyq, Almaty qalasynyń atmosferalyq aýasyn qorǵaý qaǵidalary máslihattyń 2025 jyly 30 jeltoqsandaǵy №272 sheshimimen bekitildi. Qaǵidalardyń arnaiy ekologiialyq talaptar men LEZ jumysyna qatysty keibir normalary alǵashqy resmi jariialanǵan kúnnen bastap bir kúntizbelik jyl ótken soń kúshine enedi.
«Tiisti normalardyń kúshine enýi shekteýlerdiń avtomatty túrde engiziletinin bildirmeidi. LEZ-di turaqty rejimge kóshirý úshin Almaty qalasy ákimdiginiń shyǵaryndylary tómen aimaqtyń shekarasyn belgileý týraly jeke qaýlysy qajet. Bul qaýly qabyldanǵanǵa deiin qazirgi shekaralar tek pilottyq joba aiasynda qoldanylady», – dedi sarapshy.
Onyń aitýynsha, Almatynyń geografiialyq erekshelikterin eskere otyryp, pilottyq joba qorytyndysy boiynsha LEZ shekarasyn búkil qala aýmaǵynda belgileý máselesin qarastyrǵan jón. Almaty taý bókterindegi oiysta ornalasqandyqtan, mundaǵy klimattyq jáne tabiǵi jaǵdailar lastaýshy zattardyń aýada tabiǵi jolmen taralýyna kedergi keltiredi. Atmosferalyq aýanyń lastanýy keibir aýdandar nemese kóshelermen shektelmeidi. Sondyqtan LEZ aýmaǵyn tym tar sheńberde belgileý onyń ekologiialyq tiimdiligin tómendetýi múmkin.
Sonymen qatar Erlan Buzyrbaevtyń aitýynsha, aimaqtyń shekarasyn belgileý týraly ákimdik qaýlysyn pilottyq joba oń nátije kórsetip, júieniń barlyq elementi tolyqqandy jumys isteýge daiyn bolǵannan keiin qabyldaǵan jón.
Onyń pikirinshe, bul úshin birneshe shart oryndalýy qajet. Atap aitqanda, shyǵaryndylardyń negizdelgen normativteri belgilenip, tehnikalyq tekserýdiń biryńǵai ári qaitalanǵanda birdei nátije beretin ádistemesi bekitilýge tiis. Sondai-aq, operatorlar sany jetkilikti bolyp, básekeli naryq qalyptasýy, qyzmet quny ekonomikalyq turǵydan negizdelýi, avtokólikterdi tekserý tártibi men aqparattyq júieler tolyq daiyn bolýy kerek. Ákimshilendirý tetigi de barynsha avtomattandyrylýy qajet.
