Almatydaǵy Ortalyq stadionda ótýi tiis amerikalyq reper Kane Ýestiń kontserti erteńge aýystyryldy. Buǵan qaladaǵy qolaisyz aýa raiy sebep bolǵan, dep habarlaidy dalanews.kz.
Almatyda Kane Ýestiń kontserti bastalar aldynda kún kúrt buzylyp, nóser jańbyr jaýyp, qatty jel soqty. Buǵan deiin qalada elektr qýaty óship, jaryq qaita qosylyp jatqan edi.
Soǵan qaramastan, kórermen Ortalyq stadionǵa birneshe saǵat buryn jinala bastaǵan. Uiymdastyrýshylar bastapqyda stadionda jaryq baryn jáne kontserttiń jospar boiynsha ótetinin habarlaǵan.
Keshki saǵat 19:30 shamasynda naizaǵai oinap, nóser jaýyn men ekpindi jel bastaldy. Kontsertke jarty saǵattai ýaqyt qalǵanda jańbyr basylǵanymen, saǵat 21:00-den keiin sharanyń keiinge shegerilgeni belgili boldy.
"Qurmetti qonaqtar! Keshirim suraimyz, búgingi shoýdy erteńge, dál osy ýaqytqa aýystyrýǵa májbúrmiz. Biletterińiz sol kúiinde jaramdy bolady. Túsinistikpen qaraýlaryńyzdy suraimyz, óitkeni qaýipsizdik bárinen mańyzdy", - dep málimdedi uiymdastyrýshylar.
