Almaty kóshelerinde jasyl tústi jańa taksiler paida boldy. Bul - Qazaqstan naryǵyna resmi kirgen Green SM servisiniń alǵashqy elektromobilderi. Vetnamdyq kompaniia tolyq elektrli avtoparkke negizdelgen jobasyn Almatydan bastap, keiin ony elimizdiń ózge óńirlerine de keńeitýdi josparlap otyr. Kompaniia ókilderiniń aitýynsha, servis ekologiialyq jaǵdaiǵa, qyzmet sapasyn arttyrýǵa jáne qalalyq mobildilikti jańǵyrtýǵa baǵyttalǵan, dep habarlaidy dalanews.kz.
Saltanatty rásimge Vetnamnyń Qazaqstandaǵy Tótenshe jáne Ókiletti Elshisi Ngýen Than Le, Green SM kompaniiasynyń jahandyq bas direktory Ngýen Kýok Týan, Almaty qalasy Kásipkerlik jáne investitsiialar basqarmasynyń basshysy Berikbol Mándibaev, memlekettik organdarynyń ókilderi, biznes qaýymdastyq pen kompaniia seriktesteri qatysty.
Qazaqstan naryǵy ne sebepti tańdaldy?
Green SM kompaniiasynyń jahandyq bas direktory Ngýen Kýok Týan Qazaqstan kompaniianyń halyqaralyq damý strategiiasyndaǵy mańyzdy baǵyttardyń biri ekenin aitty.
Onyń sózinshe, Qazaqstanǵa kelý jańa naryqqa shyǵýdan áldeqaida mańyzdy.
“Búgin biz tek qyzmetimizdi iske qosyp otyrǵan joqpyz. Biz Qazaqstanmen jáne onyń halqymen uzaqmerzimdi qarym-qatynas ornatýdyń jańa kezeńin bastap otyrmyz. Mundai qarym-qatynas senimge, ózara qurmetke jáne uzaq merzimdi mindettemelerge negizdelýi kerek”, – dedi ol.
Ngýen Kýok Týan keiingi ailarda kóptegen jergilikti seriktestermen jáne qoǵam ókilderimen kezdeskenin aityp, Qazaqstannyń qarqyndy damýy men turǵyndardyń bolashaqqa degen senimi erekshe áser qaldyrǵanyn jetkizdi.
Onyń pikirinshe, Qazaqstandaǵy ýrbanizatsiia qarqyny men servisterge qoiylatyn talaptyń artýy jańa tehnologiialyq sheshimderge suranysty kúsheitip otyr.
“Biz Qazaqstanǵa taǵy bir taksi qosymshasyn iske qosý úshin kelgen joqpyz. Biz adamdar kún saiyn senim arta alatyn servis qalyptastyrǵymyz keledi. Turaqty damý qoǵam úshin naqty paida ákelgen kezde ǵana mánge ie bolady”, – dedi kompaniia basshysy.
Vetnam men Qazaqstan arasyndaǵy jańa kópir
Vetnamnyń Qazaqstandaǵy Tótenshe jáne Ókiletti Elshisi Ngýen Than Le Green SM jobasyn eki el arasyndaǵy strategiialyq seriktestiktiń naqty nátijeleriniń biri ekenin atap ótti.
Onyń aitýynsha, keiingi jyldary Vetnam men Qazaqstan arasyndaǵy bailanys jańa deńgeige kóterilip, ekonomikalyq yntymaqtastyqtyń jańa kezeńi bastalǵan.
“Bul tek jańa servistiń iske qosylýy emes. Bul – Vetnam men Qazaqstan arasyndaǵy dostyqtyń, ózara senimniń jáne ortaq damý jolyndaǵy yntymaqtastyqtyń naqty kórinisi. Mundai jobalar eki el arasyndaǵy ekonomikalyq jáne tehnologiialyq bailanysty nyǵaitady”, – dedi elshi.
Ngýen Than Le qazaq mádenietindegi tulpar beinesine toqtalyp, jańa elektrli kólikterdi “zamanaýi qalanyń jasyl tulpary” dep sipattady.
“Qazaq mádenietinde tulpar kúshtiń, tózimdiliktiń jáne erkindiktiń simvoly sanalady. Búgingi elektromobilder de adamǵa qyzmet etetin, senimdi ári qorshaǵan ortaǵa ziiany az kólik quralyna ainalyp otyr”, – dedi diplomat.
Almatyǵa 100 million dollardan astam investitsiia salynbaq
Almaty qalasy Kásipkerlik jáne investitsiialar basqarmasynyń basshysy Berikbol Mándibaev jobanyń qala úshin mańyzyna toqtaldy.
Onyń aitýynsha, tolyq elektrli avtopark Almatynyń ekologiialyq ahýalyn jaqsartýǵa baǵyttalǵan bastamalardyń biri bolmaq.
“Bul – jai ǵana jańa taksi qyzmeti emes. Bul ekologiialyq jaýapkershilikke, innovatsiiaǵa jáne turaqty damýǵa negizdelgen zamanaýi qalalyq mobildilikti qalyptastyrýǵa qosylǵan úles”, – dedi ol.
Berikbol Mándibaev kompaniianyń alǵashqy jyldyń ózinde Almatyǵa 100 million AQSh dollarynan astam investitsiia salýdy josparlap otyrǵanyn aitty.
“Bul halyqaralyq investorlardyń Almatynyń investitsiialyq ahýalyna jáne ekonomikalyq áleýetine degen senimin kórsetedi. Joba ekologiialyq kólikti damytýǵa, jańa jumys oryndaryn ashýǵa jáne jolaýshylar tasymaly qyzmetiniń sapasyn arttyrýǵa yqpal etedi”, – dedi basqarma basshysy.
Green SM qandai qyzmet usynady?
Green SM Kazakhstan kompaniiasynyń bas direktory Artýr Shaimuhambetovtiń aitýynsha, kompaniianyń basty maqsaty naryqtaǵy úles úshin kúresý emes, sapaly qyzmet kórsetý.
“Biz naryqty jaýlap alý úshin emes, jolaýshylarǵa qosymsha tańdaý usyný úshin keldik. Tolyq elektrli avtopark arqyly qaýipsiz, jaily jáne ekologiialyq taza qyzmet kórsetýdi kózdeimiz”, – dedi ol.
Kompaniia alǵashqy kezeńde Almatyda VF 6 Eco úlgisindegi tolyq elektrli krossoverlerden turatyn avtoparkpen jumys isteidi. Bul modelder kúndelikti qalalyq qozǵalysqa beiimdelgen. Kompaniia ókilderiniń málimetinshe, kólikterdiń tynysh júrisi, keń salony jáne zamanaýi qaýipsizdik júieleri jolaýshylarǵa jaily ári qolaily sapar usynýǵa múmkindik beredi.
Shaimuhambetovtiń sózinshe, servistiń damýy suranysqa qarai júzege asady.
“Jelidegi kólikter sany kóbeigen saiyn jolaýshyǵa jetý ýaqyty qysqara beredi. Sonymen birge qyzmet kórsetý aýmaǵyn keńeitemiz. Bizdiń maqsatymyz – servisti múmkindiginshe kóp adamnyń paidalanýyna jaǵdai jasaý”, – dedi ol.
Qazirgi tańda jolaýshylar qosymshasynda Google Maps paidalanylady. Al júrgizýshilerge arnalǵan qosymshada 2GIS kartalaryn engizý bastalǵan.
"Eki platformany da tolyqtai 2GIS júiesine kóshirý úshin tehnikalyq integratsiia jumystaryn júrgizip jatyrmyz", – dedi kompaniia basshysy.
Júrgizýshiler arnaiy daiyndyqtan ótedi
Kompaniia júrgizýshilerdi irikteýge erekshe talap qoiady. Green SM platformasynda jumys isteý úshin júrgizýshiniń keminde úsh jyldyq tájiribesi bolýy qajet.
Budan bólek, olar teoriialyq jáne praktikalyq daiyndyqtan ótip, arnaiy emtihan tapsyrady.
“Biz biryńǵai sapa standarttaryn qalyptastyrýǵa basymdyq beremiz. Ár júrgizýshi qaýipsizdik, qyzmet kórsetý mádenieti jáne klientpen jumys isteý boiynsha arnaiy oqytylady”, – dedi Artýr Shaimuhambetov.
Kompaniia mundai mamandardy Green Drivers dep ataidy. Arnaiy oqytý baǵdarlamalary operatsiialyq standarttar, qaýipsizdik talaptary jáne klienttik servis baǵyttaryn qamtidy.
Zariadtaý infraqurylymy men seriktestik jobalar
Green SM Almatyda óz habtary men zariadtaý infraqurylymyn damytýǵa nietti.
Kompaniia árbir kóliktiń jelige shyǵar aldynda mindetti tehnikalyq tekserýden ótetinin málimdedi. Sonymen qatar jeke zariadtaý stantsiialaryn ornatyp, qaladaǵy elektrli kólik infraqurylymynyń damýyna úles qosýdy josparlap otyr.
Iske qosylý rásimi aiasynda Green SM kólik, týrizm, tehnologiia jáne qyzmet kórsetý salalaryndaǵy bes strategiialyq seriktespen yntymaqtastyq týraly kelisimge qol qoidy. Bul kelisimder Green Alliance Frontier bastamasy aiasynda júzege asyryldy.
Kompaniianyń málimetinshe, atalǵan platforma turaqty damý qaǵidattaryn qoldaityn uiymdardy biriktirip, túrli elderdegi jergilikti qaýymdastyqtarǵa oń áser etetin jobalardy damytýǵa baǵyttalǵan.
Jolaýshylarǵa alǵashqy jeńildik usynylady
Kompaniia iske qosylý qurmetine arnaiy naýqan jariialady. Green SM mobildi qosymshasy arqyly rásimdelgen saparlarǵa 26 paiyz jeńildik qarastyrylǵan. Jeńildik kólemi 2626 teńgege deiin jetedi.
Qazirgi tańda Green SM qosymshasy Qazaqstandaǵy paidalanýshylar úshin App Store jáne Google Play platformalarynda qoljetimdi.
Kompaniia ókilderiniń aitýynsha, Almatydaǵy jobanyń nátijesine qarai servis aldaǵy ýaqytta Qazaqstannyń basqa óńirlerine de kezeń-kezeńimen keńeitilýi múmkin.
