Almatyda ekologiialyq talaptarǵa sai kelmeitin eski kólikterdi azaitýǵa baǵyttalǵan jańa baǵdarlama ázirlenip jatyr. Alaida joba aiasynda turǵyndardyń avtokólikterin tikelei satyp alý qarastyrylmaǵan. Bul týraly "Almaty" áleýmettik-kásipkerlik korporatsiiasy, dep habarlaidy dalanews.kz.
ÁKK 2026–2028 jyldarǵa arnalǵan avtokólik quraldaryn kádege jaratý jónindegi óńirlik baǵdarlamanyń jobasyn ázirlegen. Qazir baǵdarlama daiyndyq kezeńinde, ony júzege asyrý tetigi pysyqtalyp jatyr. Sondyqtan jobanyń naqty qashan iske qosylatyny ázirge belgisiz.
"Baǵdarlamany iske asyrý tetigi ázirlenip, bekitilgennen keiin ony iske qosý merzimi, qatysý sharttary jáne ózge de parametrleri aiqyndalatyn bolady", - delingen resmi jaýapta.
Korporatsiianyń málimetinshe, bastapqyda aitylǵandai, turǵyndardan eski avtokólikterdi tikelei satyp alý kózdelmeidi. Onyń ornyna avtodilerler men kólik óndirýshilerin jeńildikpen qarjylandyrý tetigi qarastyrylyp jatyr.
Osy mehanizm boiynsha ekologiialyq klasy tómen avtokólik ieleri eski kóligin tapsyrǵan kezde jańa mashina satyp alýǵa arnalǵan jeńildik sertifikatyn alýy múmkin.
"Ekologiialyq klasy tómen avtokólik ielerine jańa avtokólik satyp alý kezinde jeńildik sertifikattaryn berý kózdelýde. Jeńildik mólsheri, tapsyrylatyn avtokólikti baǵalaý tártibi, qarjylandyrý kólemi jáne qatysýǵa qatysty ózge de sharttar baǵdarlamany iske asyrý tetigi bekitilgennen keiin aiqyndalatyn bolady", – dep habarlady "Almaty" ÁKK.
Demek, ázirge jeńildiktiń naqty kólemi, qandai kólikter qabyldanatyny jáne eski mashinalardyń qalai baǵalanatyny belgilenbegen. Sondai-aq baǵdarlamaǵa qatysý úshin avtokólik ielerine qoiylatyn talaptar da keiin jariialanady.
Jobanyń negizgi maqsaty – Almatydaǵy aýanyń lastanýyna aitarlyqtai áser etetin avtokólik shyǵaryndylaryn azaitý. Baǵdarlama ekologiialyq talaptarǵa sáikes kelmeitin eski mashinalardy ainalymnan shyǵaryp, keiin kádege jaratýdy kózdeidi.
ÁKK ókilderiniń aitýynsha, bul shara qaladaǵy kólik parkin jańartýǵa yntalandyryp, eski avtokólikter sanyn qysqartýǵa múmkindik beredi. Nátijesinde atmosferaǵa taraityn ziiandy zattardyń kólemi azaiady dep kútilip otyr.
