Almatyda burynǵy RPTs din qyzmetkeri Iakov Vorontsov esirtkige uqsas psihotroptyq zatty asa iri mólsherde zańsyz saqtady dep tanylyp, amnistiiany eskere otyryp tórt jylǵa bas bostandyǵynan aiyryldy, dep habarlaidy dalanews.kz.
Isti Almaty qalasynyń Medeý aýdandyq soty qaraǵan. Sot Vorontsovty Qylmystyq kodekstiń 296-baby 4-bóligi boiynsha kináli dep tanydy. Bul bap esirtki quraldaryn, psihotroptyq zattardy nemese olardyń analogtaryn ótkizý maqsatynsyz asa iri mólsherde zańsyz satyp alý jáne saqtaý áreketterin qamtidy.
Tergeý nusqasyna sáikes, Vorontsov turǵan úide júrgizilgen tintý kezinde 2,44 gramm 3-CMC metkatinonynyń analogy tabylǵan. Sot materialdarynda bul mólsher asa iri dep baǵalanǵan.
Sot málimetinshe, aiyptaý tintý nátijeleri, saraptamalar, kýálardyń jaýaptary jáne istiń basqa da materialdarymen dáleldengen. Sonymen qatar aqpan aiynda júrgizilgen meditsinalyq kýálandyrý Vorontsovtyń kannabinoidtardy qoldanǵanyn kórsetken.
Buǵan deiin ol kannabinoidtardy qoldanǵany úshin ákimshilik jaýapkershilikke tartylyp, 10 táýlikke ákimshilik qamaýǵa alynǵan.
Bul bap boiynsha úsh jyldan jeti jylǵa deiin bas bostandyǵynan aiyrý jazasy qarastyrylǵan. Sot Vorontsovqa alty jyl jaza taǵaiyndaǵan. Keiin jańa Konstitýtsiia qabyldanýyna bailanysty jariialanǵan raqymshylyq qoldanylyp, jaza merzimi úshten birge qysqartylyp, tórt jylǵa deiin tómendetilgen.
Vorontsov taǵylǵan aiypty moiyndamaǵan.
Ol aqpan aiynda ustalǵan. Bastapqyda oǵan esirtki pritonyn uiymdastyrdy degen aiyp ta taǵylǵan, alaida keiin prokýratýra bul aiypty alyp tastaǵan.
Is boiynsha sot talqylaýy 16 qyrkúiekte bastalǵan. Birinshi otyrysta prokýror protsesti jýrnalister men jurtshylyq úshin jabyq ótkizýdi suraǵan. Qorǵaý tarapy buǵan qarsylyq bildirgen.
Osydan keiin Vorontsov ashtyq jariialaǵan. Onyń advokaty Ǵalym Nurpeiisov buǵan deiin qylmystyq qýdalaýdy saiasi sipattaǵy is dep baǵalap, sot otyrystaryn jabyq ótkizýdiń oryndylyǵyna qarsylyq bildirgen.
Sot úkimi boiynsha Vorontsov tórt jylǵa bas bostandyǵynan aiyryldy.
