Almaty ákimdigi 2026 jylǵy 14 tamyzda elimizdiń energetikalyq júiesindegi qýat teńgeriminiń apattyq buzylýyna bailanysty qalada syrtqy elektrmen jabdyqtaý ýaqytsha óshkenin málimdedi, dep habarlaidy dalanews.kz.
Vedomstvonyń habarlaýynsha, qazirgi ýaqytta barlyq qalalyq qyzmetter kúsheitilgen rejimde jumys istep, megapolistiń qalypty tynys-tirshiligin qamtamasyz etý úshin qajetti sharalardy qabyldap jatyr.
Metro ýaqytsha toqtatyldy
Elektr energiiasynyń óshýine bailanysty Almaty metropoliteniniń jumysy ýaqytsha toqtatyldy. Qazir metro stantsiialary elektr qýaty tolyq qalpyna keltirilip, bailanys relsine kerneý berilgenge deiin kirip-shyǵýǵa jabyq bolady. Metro qozǵalysynyń qaita iske qosylatyny týraly qosymsha habarlanady.
Aýrýhanalar rezervtik qýat kózderine kóshti
Qaladaǵy statsionarlar men basqa da meditsinalyq uiymdar úzdiksiz jumys isteý josparyna sáikes qyzmet kórsetýdi jalǵastyryp jatyr. Meditsinalyq mekemeler dizeldi generatorlarmen jáne úzdiksiz qýat kózderimen qamtamasyz etilgen.
Eń aldymen jansaqtaý bólimderi, operatsiialyq bloktar, qabyldaý bólimderi, tirshilikti qamtamasyz etý júieleri men ózge de asa mańyzdy jabdyqtar rezervtik elektr qýatymen qamtylýda. Shuǵyl meditsinalyq kómek belgilengen tártippen kórsetilip jatyr.
Sý qysymy tómendeýi múmkin
Ákimdik málimetinshe, elektr energiiasynyń óshýine bailanysty qalanyń keibir aýdandarynda sý qysymynyń ýaqytsha tómendeýi jáne sýmen jabdyqtaýda irkilister bolýy múmkin. Ásirese kópqabatty úilerdiń joǵarǵy qabattarynda mundai jaǵdai jii baiqalýy yqtimal.
Bul elektr qýatymen jumys isteitin sorǵy stantsiialarynyń ýaqytsha toqtaýymen bailanysty. Elektrmen jabdyqtaý qalpyna kelgennen keiin sorǵy stantsiialary qaita iske qosylyp, sý berý birtindep turaqtalady.
Keibir baǵdarshamdar jumysyn toqtatty
Elektr jelilerine táýeldi birqatar baǵdarsham nysandary da ýaqytsha isten shyqqan. Osyǵan bailanysty jol qozǵalysynyń qaýipsizdigin qamtamasyz etý úshin politsiia qyzmetkerleri baǵdarshamdar jumys istemeitin ýchaskelerde kólik qozǵalysyn retteý sharalaryn qolǵa alǵan.
Almaty ákimdigi qalalyq qyzmettermen birlesip jaǵdaidy baqylaýdy jalǵastyryp jatqanyn jáne tirshilikti qamtamasyz etý nysandarynyń turaqty jumysyn saqtaý úshin barlyq qajetti sharalardy qabyldap jatqanyn málimdedi.
Elektrmen jabdyqtaýdy tolyq qalpyna keltirý jáne jaǵdaidyń ózgerýi týraly qosymsha aqparat keiinirek jariialanady. Ákimdik turǵyndardy sabyr saqtaýǵa jáne tek resmi aqparat kózderine senýge shaqyrdy.
