Áleýmettik jelilerde Almaty oblysynda Halyqqa qyzmet kórsetý ortalyǵynyń (HQKO) qyzmetkeri qatysqan ólimmen aiaqtalǵan jol-kólik oqiǵasy týraly aqparat tarady, dep habarlaidy dalanews.kz.
Jeli qoldanýshylarynyń málimetinshe, er adam qyzmettik avtokólikpen zeinetker áieldi qaǵyp ketip, oqiǵa ornynan boi tasalaǵan.
Politsiia atalǵan jol apatynyń bolǵanyn rastady. Aldyn ala málimet boiynsha, 11 tamyz kúni keshke Almaty – Shelek – Qorǵas – Baiseiit tasjolynda Kia Sorento kóligin basqarǵan 26 jastaǵy júrgizýshi joldy belgilenbegen jerden kesip ótpek bolǵan 77 jastaǵy áieldi qaǵyp ketken. Saldarynan zeinetker oqiǵa ornynda kóz jumǵan.
Quqyq qorǵaý organdarynyń málimetinshe, júrgizýshi apattan keiin oqiǵa ornyn tastap ketken. Alaida keiinnen ustalyp, qamaýǵa alynǵan.
Sonymen qatar áleýmettik jelilerde «Azamattarǵa arnalǵan úkimet» memlekettik korporatsiiasynyń oblystyq filialy basshylyǵy bolǵan jaǵdaidy jasyrýǵa tyrysty degen aqparat ta jariialandy. Jariialanym avtorynyń aitýynsha, jol apatyna túsken qyzmettik kólik birneshe kún boiy jasyrylyp, oqiǵa týraly málimet ortalyq apparatqa ýaqytyly jetkizilmegen.
«Azamattarǵa arnalǵan úkimet» memlekettik korporatsiiasy jol apatyna filial qyzmetkeriniń qyzmettik kólikpen túskenin rastady. Vedomstvonyń habarlaýynsha, júrgizilgen qyzmettik tekserýdiń qorytyndysy boiynsha filial direktory men onyń orynbasary tártiptik jaýapkershilikke tartylǵan.
Memlekettik korporatsiia qyzmettik kólikterdi baqylaýdyń jetkiliksiz bolǵanyn jáne qyzmettik aqparattyń tiisti deńgeide usynylmaǵanyn atap ótti. Al kólik júrgizýshisiniń jaýapkershiligi qylmystyq is aiasyndaǵy tergeý men sot qaraýynyń nátijesinde anyqtalmaq.
