Prokýratýranyń resmi málimetinshe, qoǵam belsendisi ári «Shańyraq» qoǵamdyq birlestiginiń basshysy Almasbek Sadyrbaidyń ústinen qozǵalǵan qylmystyq is boiynsha tergeý jumystary aiaqtaldy, dep habarlaidy Dalanews.kz.
Bul týraly Tizgin.kz portalyna joldanǵan jaýapta aitylǵan.
"Almaty oblysy prokýratýrasynyń sotqa deiingi tergep-tekserý basqarmasy A.J. Sadyrbaidyń uiymdasqan qylmystyq toby men onyń 7 sybailasyna (oryndaýshylar men deldaldarǵa) qatysty isti tergeýdi aiaqtady. Qylmystyq is QK-niń 190-baby 4-bóliginiń 1 jáne 2-tarmaqtary, 218-baptyń 3-bóliginiń 2 jáne 3-tarmaqtary, sondai-aq 262-baptyń 1 jáne 2-bólikteri boiynsha qozǵalǵan. Qazirgi ýaqytta is materialdarmen tanysý kezeńinde tur", – delingen habarlamada.
Eske salaiyq, byltyr 6 qarashada Sadyrbai ózi basqaratyn adamdar toby Balqash, Eńbekshiqazaq, Kegen, Raiymbek jáne Uiǵyr aýdandarynda jalǵan aýyl sharýashylyǵy kooperativterin qurdy degen kúdikke ilingen.
Negizgi maqsat - usaq maldyń analyq basyn uryqtandyrýǵa sýbsidiialardy zańsyz alý jáne jemshóp shyǵyndaryn óteý.
"Bul úshin zańnamaǵa qaishy aýylsharýashylyq jerleri joq sharýa qojalyqtary tartyldy. Budan ári jalǵan kadastrlyq nómirlerdi kórsete otyryp, dáieksiz málimetterdi qamtityn sýbsidiialar alýǵa ótinimder qashyqtan berildi. Bul rette aýyl sharýashylyǵy kooperativteri basshylaryn habardar etpei, olardyń ETsQ-sy paidalanyldy.
Osylaisha 1,2 mlrd teńgeden astam qarajat urlanǵan", - dep habarlady buǵan deiin QMA.
Keiin Almasbek Sadyrbaev ustaldy. Onyń sybailasy tergeý sotynyń sanktsiiasymen úi qamaqqa alyndy.
Al ustalǵanynan eki apta buryn Almasbek Sadyrbaev Arman Abdollaǵa suhbat bergen. Sadyrbaev óz suhbatynda eldegi nan baǵasynyń qymbat ekenin aityp, onyń shyn baǵasy 50 teńge bolýy keregin de aitty.
Sondai-aq, Qazaqstanda qashan asharshylyq bolatynyn da boljaǵan.
