Á. Qasteev atyndaǵy Qazaqstan Respýblikasynyń Ulttyq óner mýzeiinde jańǵyrtylǵan «Art-zerthana» mýzeilik kórkemsýret stýdiiasy tanystyryldy. Munda jyl saiyn 3 myńǵa jýyq bala men eresek shyǵarmashylyqpen ainalysa alady, dep habarlaidy dalanews.kz.
Is-sharaǵa QR Premer-ministriniń orynbasary – Mádeniet jáne aqparat ministri Aida Balaeva, «Samuryq-Qazyna» AQ basqarma tóraǵasy Nurlan Jaqypov, Á. Qasteev atyndaǵy QR Ulttyq óner mýzeiiniń direktory Gúlaiym Jumabekova, elimizdiń mádeniet jáne óner qairatkerleri, sheberler men mýzeilik kórkemsýret stýdiiasynyń shákirtteri qatysty.
«Art-zerthana» – mýzei pedagogikasy aiasynda 2007 jyldan beri júzege asyrylyp kele jatqan Ulttyq óner mýzeiiniń shyǵarmashylyq-bilim berý jobasy. Onyń basty maqsaty – balalardyń, jasóspirimderdiń, jastar men eresekterdiń beineleý ónerine qyzyǵýshylyǵyn arttyryp, shyǵarmashylyq áleýetin ashý.
Kásibi sýretshi-pedagogterdiń jetekshiligimen akademiialyq sýret, keskindeme, kompozitsiia, grafika, sándik-qoldanbaly óner jáne shyǵarmashylyq izdenistiń túrli baǵyttary boiynsha sabaqtar ótkiziledi. Joba júzege asyrylǵan ýaqyttan beri stýdiiada 10 myńnan astam bala men jasóspirim bilim aldy.
Sonymen qatar stýdiia erekshe bilim berý qajettilikteri bar balalarǵa arnalǵan shyǵarmashylyq baǵdarlamalardy júieli túrde júzege asyryp, inkliýzivti mýzeilik bilim berý qaǵidattaryn damytýǵa úles qosyp keledi.
Jańǵyrtylǵan jobanyń tanystyrylymynda Aida Balaeva ónerdi damytýǵa memlekettik qoldaý kórsetý, jastardy shyǵarmashylyqqa baýlý jáne olardyń qabiletin ashýǵa qolaily jaǵdai jasaý mádeniet saiasatynyń mańyzdy basymdyqtarynyń biri ekenin atap ótti.
«Memleket basshysy mádeniet salasyna airyqsha kóńil bólip keledi. Salany qoldaýǵa baǵyttalǵan júieli memlekettik saiasattyń arqasynda búginde naqty nátijelerge qol jetkizdik. 2025 jyly Qazaqstan Respýblikasynyń Ortalyq memlekettik mýzeii men Ábilhan Qasteev atyndaǵy Memlekettik óner mýzeiine, al 2026 jyly Ulttyq mýzeige «Ulttyq» mártebesi berildi. Sonymen qatar Prezidenttiń tapsyrmasy boiynsha byltyr «Samuryq-Qazyna» qory Qasteev mýzeiinde aýqymdy jóndeý jumystaryn júrgizdi. «Qazaqstannyń eńbek sińirgen sýretshisi» qurmetti ataǵynyń taǵaiyndalýy da mańyzdy sheshimniń biri boldy. Bul otandyq beineleý óneriniń qoǵamdaǵy ornyna berilgen joǵary baǵa ári óz isine adaldyqpen qyzmet etip kele jatqan sýretshilerdiń kópjyldyq eńbegine kórsetilgen laiyqty qurmet. Osy múmkindikti paidalana otyryp, mádeniet salasynyń barsha ókilderiniń jáne jeke ózimniń atymnan Memleket basshysyna salaǵa kórsetip kele jatqan turaqty qoldaýy úshin shynaiy rizashylyǵymdy bildiremin», – dedi Premer-ministrdiń orynbasary.
«Samuryq-Qazyna» qorynyń qoldaýymen júzege asyrylǵan joba aiasynda mýzeidiń shyǵarmashylyq keńistigi jańǵyrtyldy. Aýmaǵy 110 sharshy metrden asatyn zerthana keskindeme, grafika jáne sándik-qoldanbaly óner sabaqtaryn ótkizýge arnalǵan zamanaýi qural-jabdyqtarmen qamtamasyz etildi. Sonymen qatar stýdiiada shyǵarmashylyq jumystardy tanystyrýǵa arnalǵan, zamanaýi fotoapparatýramen jabdyqtalǵan arnaiy fotokeńistik quryldy. Bul shákirtterge óz týyndylaryn kásibi deńgeide tanystyryp, shyǵarmashylyq jetistikterin tsifrlyq keńistikte keńinen kórsetýge múmkindik beredi. Munda 5 pen 17 jas aralyǵyndaǵy balalar men jasóspirimderge arnalǵan sheberlik sabaqtary, shyǵarmashylyq praktikýmdar jáne tabiǵat aiasyndaǵy sýret salý sabaqtary ótkiziledi.
«Art-zerthana» jas daryndar bas qosatyn shyǵarmashylyq ortaǵa ainalyp, olardyń damýyna jáne tyń izdenisterine jańa múmkindikter beredi dep senemin. «Samuryq-Qazyna» úshin mádenietti qoldaý – ulttyq muramyzdy saqtaýǵa jáne zamanaýi mádeni ortany damytýǵa qosylǵan úles», – dedi Nurlan Jaqypov.
Aita keteiik, stýdiia shyǵarmashylyq qabileti joǵary balalar men jastardy qoldaýǵa, olardyń bolashaq mamandyǵyn durys tańdaýyna erekshe kóńil bóledi. Daryndy shákirtterdi joǵary jáne orta arnaýly kórkemóner oqý oryndaryna túsýge daiarlap, shyǵarmashylyq áleýetiniń damýyna jáne bolashaq sýretshi retinde qalyptasýyna yqpal etedi.
Is-shara aiasynda qonaqtarǵa mýzeidiń tsifrlyq portaly da tanystyryldy. Jańǵyrtylǵan portaldyń qoldanysy barynsha yńǵaily ári inkliýzivti bola tústi. Endi kelýshiler mýzei kollektsiiasy men kórmelerin onlain tamashalai alady. Al 3D-týr kez kelgen jerden mýzei keńistigine virtýaldy saiahat jasap, ekspozitsiialarmen tanysýǵa múmkindik beredi.
