«Ádilet» partiiasynyń III kezekten tys sezinde Quryltai depýtattyǵyna kandidattardyń partiialyq tizimi bekitildi, dep habarlaidy dalanews.kz.
Partiia tóraǵasy Aibek Dádebaidyń aitýynsha, jańa Konstitýtsiia kúshine engennen keiin ótetin alǵashqy Quryltai sailaýy eldiń saiasi júiesin jańǵyrtýdyń mańyzdy kezeńi bolmaq. Onyń sózinshe, partiia sailaýǵa kásibi komandamen jáne naqty baǵdarlamamen qatysady.
Bekitilgen tizimge memlekettik qyzmette, zań shyǵarý salasynda, bilim berý, ekonomika, qarjy, quqyq jáne qoǵamdyq sektorda tanylǵan tulǵalar endi.
Kandidattardyń qatarynda Memlekettik keńesshi Erlan Karin, burynǵy Oqý-aǵartý ministri Ashat Aimaǵambetov, Joǵary aýditorlyq palatanyń burynǵy tóraiymy Natalia Godýnova, zańger ári konstitýtsiialyq quqyq salasynyń mamany Marat Báshimov, Májilis depýtaty Erlan Sairov, depýtat Konstantin Avershin, qoǵam qairatkeri Aleksandr Danilov, energetika salasynyń ókili Suńǵat Esimhanov, media salasynyń ókili Raýshan Qajybaeva, qoǵam belsendileri Snejanna Imasheva men Gúlzira Atabaeva, sondai-aq partiia tóraǵasy Aibek Dádebai bar.
Sonymen birge partiialyq tizimge burynǵy AHQO basqarýshysy Renat Bekturov, qoǵam qairatkeri Raýan Kenjehanuly, IT, biznes, bilim berý, densaýlyq saqtaý, ónerkásip, mádeniet, ǵylym jáne azamattyq qoǵam salalarynyń ókilderi engizildi.
Partiia málimetinshe, kandidattar arasynda memlekettik qyzmetshilermen qatar dárigerler, muǵalimder, injenerler, kásipkerler, zańgerler, ǵalymdar, IT-mamandar, shyǵarmashylyq indýstriia ókilderi jáne eriktiler bar. Áielder men jastarǵa da partiialyq tizimnen eleýli oryn berilgen.
Aita keteiik, «Ádilet» partiiasy biyl mamyr aiynda qurylyp, 1 maýsymda Ádilet ministrliginde resmi tirkeldi. Partiia jańa Konstitýtsiia aiasynda ótetin alǵashqy Quryltai sailaýyna qatysyp otyrǵan jańa saiasi kúshterdiń biri sanalady.
