Abai oblysynda aimaq basshysy Berik Ýálidiń bastamasymen osydan 6 ai buryn bastalǵan «Qaladan – aýylǵa» jobasy qarqyndy júzege asyrylyp jatyr. Jobaǵa qyzyǵýshylyq tanytqan azamattar sany artyp, aýyldyq jerlerge qonys aýdarýshylar qatary kóbeiip keledi, dep habarlaidy dalanews.kz.
Osy ýaqyt aralyǵynda oblysqa jalpy sany 1241 adamnan turatyn 395 otbasy qonys aýdardy. Onyń ishinde 508 adam Semei qalasynan, 733 adam elimizdiń basqa óńirlerinen kóship keldi.
Sońǵy aptada oblys aýyldaryna 42 otbasy qonystandy. Bul – joba bastalǵaly bir aptadaǵy eń joǵary kórsetkishterdiń biri. Buǵan deiin aptasyna orta eseppen 10-15 otbasy kóship kelgen.
Jobany iske asyrý aiasynda oblys ákiminiń tapsyrmasyna sáikes jyl sońyna deiin óńirge 500 otbasyn kóshirý mejesi belgilengen. Qazirgi tańda bul jospar 79 paiyzǵa oryndaldy. Belgilengen mejege sáikes ár aýdanǵa 50 otbasynan qabyldaý mindeti qoiylǵan. Bul kórsetkish qala jáne aýdan ákimderiniń qyzmetin reitingtik baǵalaý júiesine de engizilgen.
Qonys aýdarǵan otbasylardyń jańa ortaǵa beiimdelýi men turmys jaǵdaiyn baqylaý jumystary turaqty júrgizilýde. Ár otbasy nazarǵa alynyp, olardyń jaǵdaiy, ótinish-tilekteri men týyndaǵan máseleleri zerdelenip jatyr. Bul baǵyttaǵy jumystar aýdan ákimderiniń jobaǵa jaýapty orynbasarlary jáne aýyl ákimderimen birlesip júrgizilip, qonys aýdarǵan otbasylardyń máselelerin jedel ári tiimdi sheshýge basymdyq berilýde.
Aita keteiik, biylǵy jyldyń 20 aqpanynda Semeide oblys ákimi Berik Ýálidiń bastamasymen «Qaladan – aýylǵa» óńirlik forýmy ótti. Forým aiasynda «Qaladan – aýylǵa» atty jańa jobanyń bastalǵany jariialanǵan bolatyn.
