Boksshy Aidar Sháribaev Dýbaida ótken IBA álem chempionatynda júlde alǵan qazaqstandyq sportshylarǵa tiesili syiaqynyń áli tólenbegenin málimdedi. Ol Qazaqstan boks federatsiiasy men Týrizm jáne sport ministrliginen bul jaǵdaiǵa qatysty naqty jaýap berýdi talap etti, dep habarlaidy dalanews.kz.
Sháribaevtyń aitýynsha, qazaqstandyq boksshylar atalǵan álem chempionatynda úsh altyn, bir kúmis jáne eki qola medal jeńip alǵan. Jarystyń jalpy júlde qory 8 million dollar bolǵan. Onyń esebinshe, Qazaqstan quramasynyń ókilderine tiesili syiaqynyń jalpy kólemi shamamen 1,2 million dollardy quraidy.
"Álem chempionaty ótkeli toǵyz ai boldy. Alaida júlde alǵan boksshylarymyz áli bir tiyn almaǵan. Nege Qazaqstan boks federatsiiasy sportshylarǵa tiesili syiaqyny talap etip, alyp bermei otyr? Bul qarajattyń ne sebepti tólenbegeni belgisiz", - dedi ol.
Boksshy IBA erejesi boiynsha syiaqynyń 50 paiyzy sportshyǵa, 25 paiyzy bapkerge, qalǵan 25 paiyzy ulttyq federatsiiaǵa tiesili bolǵanyn atap ótti. Osyǵan bailanysty ol federatsiia óz úlesine tietin qarajatty qandai maqsatqa jumsaitynyn da surady.
"Syiaqynyń 25 paiyzy federatsiiaǵa tiesili bolsa, ol aqsha qandai baǵytqa jumsalady? Jalpy, qarajat federatsiiaǵa aýdaryldy ma? Osy másele de ashyq aitylýǵa tiis", - dedi Sháribaev.
Ol syiaqy tóleýdiń uzaqqa sozylýyna bailanysty qarajattyń osy ýaqyt ishinde qalai saqtalǵany jóninde de suraq týyndaitynyn jetkizdi. Boksshynyń sózinshe, million dollardy jyldyq 20 paiyzdyq mólsherlememen depozitke salǵannyń ózinde ai saiyn shamamen 8 million teńge tabys túsýi múmkin.
"Arada toǵyz ai ótkenin eskersek, federatsiia bul qarajatty kóbeitip, keiin boksshylarǵa bergisi kele me degen de suraq týady", – dedi ol.
Aidar Sháribaev 2023 jyly Tashkentte ótken álem chempionatyndaǵy syiaqy júiesin de eske saldy. Onyń aitýynsha, Qazaqstan quramasy sol jarysta jalpykomandalyq esepte Ózbekstannan keiin ekinshi oryn alǵan. IBA altyn medal ielerine 200 myń dollardan bergen, al sol kezdegi Qazaqstan boks federatsiiasynyń prezidenti Keńes Raqyshev federatsiia atynan ár chempionǵa qosymsha 100 myń dollardan tabystaǵan.
"Nelikten bul úrdis keiingi álem chempionattarynda jalǵaspady? Qarajat taýsyldy ma, álde boksshylardy yntalandyrý máselesi keiingi orynǵa ysyryldy ma?", - dep surady sportshy.
Sonymen qatar Sháribaev Dýbaidaǵy chempionatta besinshi jáne altynshy oryn alǵan boksshylarǵa IBA tarapynan 10 myń dollardan qolma-qol aqsha berilgenin aitty. Onyń málimdeýinshe, federatsiia ókilderi keiin bul qarajatty sportshylardan alyp qoiǵany jóninde ózine aqparat jetken.
"Jaýapty qyzmette otyrǵan adamdardyń tabysy az emes dep oilaimyn. Boksshylardyń mańdai terimen alǵan 10 myń dollar syiaqysyn da qoldarynan alý – óte uiat jaǵdai. Alaida bul jóninde maǵan jetken aqparatqa federatsiia naqty túsinikteme berýi kerek", - dedi ol.
Sondai-aq Sháribaev Qazaqstan boks federatsiiasy men jaýapty memlekettik organnan kóterilgen máselelerge jedel ári ashyq jaýap berýdi surady.
