Украина Ресейдің мұнай өңдеу зауыттарына шабуылдарды қайта бастады. Бұл туралы Украина президенті Владимир Зеленский мәлімдеді, ал 15 қазанда Рязань облысындағы мұнай өңдеу зауытына дрондармен шабуыл жасалғаны хабарланды, деп хабарлайды dalanews.kz.
Рязань облысының губернаторы Павел Малковтың мәліметінше, аймаққа жасалған ірі дрон шабуылынан кейін мұнай өңдеу зауытында өрт шыққан. Қазір келтірілген материалдық шығын бағаланып, төтенше жағдайлар қызметі оқиға орнында жұмыс істеп жатыр.
Зеленскийдің айтуынша, Украина АҚШ президенті Дональд Трамп Ресей мен Украина арасындағы энергетикалық нысандарға шабуыл жасамау жөніндегі уақытша келісімді жариялағаннан кейін Ресейдің мұнай инфрақұрылымына соққы беруді екі күнге тоқтатқан. Алайда Мәскеу Украинадағы энергетикалық нысандарға шабуылдарын жалғастырған.
Украина президенті АҚШ-тың Киевке әскери барлау мәліметтерін беруді шектегеніне және Starlink спутниктік байланыс қызметінің жұмысы баяулағанына наразылық білдірді. Оның сөзінше, украиналық әскери қызметкерлерге энергетикалық нысандарға шабуыл тоқтатылмаса, барлау ақпараты берілмейтіні ескертілген. Вашингтон бұл мәселе бойынша өз ұстанымын бөлек білдірген.
Зеленский Ресейдің мұнай өңдеу зауыттарына шабуыл жасауды тоқтату мәселесін АҚШ-пен қарым-қатынасты жақсарту үшін қарастыруға дайын екенін, бірақ оның орнына Украинаға қосымша америкалық Patriot әуе қорғанысы жүйелерінің зымырандары берілуі керектігін айтты.
Бұған дейін Трамп Украинаға Ресейдің мұнай инфрақұрылымына шабуыл жасауды тоқтатуға шақырған. Бұл мәселе мұнай өнімдерінің әлемдік бағасы өскен кезеңде көтеріліп отыр.
