АҚШ-тағы ең ауқатты азаматтардың байлығы тарихи ең жоғары деңгейге жетті. Қазір елдегі ең бай 0,00001% тұрғын ұлттық табыстың шамамен 12%-ын бақылап отыр. Бұл туралы Bloomberg мәлімдеді, деп хабарлайды dalanews.kz.
Сарапшылардың түсіндіруінше, ұлттық табыс – бұл экономикадағы барлық табыстың жиынтығы. Оған еңбек ақы, кәсіпкерлік қызметтен түсетін пайда және инвестициялық кірістер кіреді. Bloomberg дерегіне сәйкес, 2008 жылғы жаһандық қаржы дағдарысынан бері АҚШ-тағы ең бай адамдардың ұлттық табыстағы үлесі төрт еседен астам өскен.
Салыстыру үшін, 1950–1990 жылдар аралығында бұл көрсеткіш ешқашан 1%-дан аспаған.
Сарапшылар мұндай өсімді қор нарығындағы акциялардың бұрын-соңды болмаған қымбаттауымен және жылжымайтын мүлік бағасының айтарлықтай өсуімен байланыстырады. Соның нәтижесінде ең көп пайда активтердің – акциялар, компаниялар мен жылжымайтын мүліктің иелеріне тиген. Ал мұндай активтері жоқ азаматтар бұл өсімнен айтарлықтай пайда көрмеген.
