Елорда тұрғындарының көптеген өтініштеріне байланысты қазанның екінші жексенбісінде атап өтілетін Мүгедектер күніне арналған төлем сараланды. 2024 жылы бірінші топтағы мүгедектер 20 АЕК (69 мың теңге), екіншісі топ 10 АЕК (34 500 теңге), үшінші топ 5 АЕК (17 250 теңге) алады.
1 шілдеден бастап мүгедектігі бар азаматтарға гигиеналық құралдарды (жөргектерді) – 1460 дана (күніне 4 дана) беру нормалары ұлғайтылды (бұрын 730 дана (күніне 2 дана), алушының қалауы бойынша тоқсан сайын қамтамасыз ету – тоқсанына кемінде 360 дана.
– 1-топтағы мүгедектігі бар ертіп жүрушілерді санаторий-курорттық емдеуге жұмсалған шығындарды өтеу түріндегі төлемдер мөлшері 35 АЕК-тен 55 АЕК-ке дейін ұлғайтылды. Бұл норма осы жылдың 4 қарашасынан бастап енгізілді.
Мүгедектігі бар адамдар оңалту және абилитациялаудың жеке бағдарламасына, оның ішінде әлеуметтік және кәсіптік бағдарламасына сәйкес оңалту қызметтерімен қамтамасыз етілуде.
Сонымен қатар ерекше қажетілікті талап ететін азаматтарға техникалық көмекші құралдар және оңалту қызметтерімен қамтамасыз ету, әлеуметтік оңалту шараларымен әлеуметтік қызметтер порталы арқылы 28 мыңнан астам мүгедек адам қамтылған, – деп хабарлады Еркебұлан Мәлік.
Сонымен қатар қаладағы 19 967 мүмкіндігі шектеулі азамат қозғалыс құралдарын, сурдотехникалық, тифлотехникалық, гигиеналық, протездік-ортопедиялық түрінде көмек алған.
Оңалту қызметтерімен 8 810 адам қамтылды. Олар – ымдау тілі маманы – 506 адам, жеке көмекші – 2 762 адам, санаторий-курорттық емдеумен – 5 542 адам.
Ерекше қажеттіліктері бар адамдар үшін елордада «Инватакси» жұмыс істейді. Қызметтер 5 бағыт бойынша 117 автокөлікте – 16 мамандандырылған және 101 жеңіл автокөлік үздіксіз қызмет көрсетеді. Күніне орта есеппен 1 167 сапар жүзеге асырылады, «Инватакси» қызметін елорданың 2 905 тұрғыны пайдалануда.
– Көрсетілетін қызметті алушыларды толық қамту, сондай-ақ инватакси қызметін ұсыну тетігін дамыту, сапа мен жылдамдықты арттыру шеңберінде елордада 2023 жылғы 10 шілдеден бастап Яндекс Go сервисі арқылы пилоттық жоба іске қосылды. Оған 195 мүгедек адам қатысып, 11 144 сапар жүзеге асырылды, – деп толықтырды спикер.
Сонымен қатар, қаланың барлық аудандық әкімдіктері мүмкіндігі шектеулі жандар үшін кедергісіз орта сапасына тұрақты мониторинг жүргізеді. 2023-2027 жылдарға арналған тиісті жол картасы қабылданды.
Басқарма сондай-ақ 10 ведомстволық бағынысты мекеменің жұмысын үйлестіреді. Оның 6-ауы арнаулы әлеуметтік қызметтер көрсетеді. Оның ішінде 4-еуі мүгедектігі бар адамдар үшін («Нұрлы жүрек» ӘҚКО, «Қамқор» ӘҚКО, «Шарапат» ӘҚКО, «Жансая» ӘҚКО).
– Сонымен қатар, мүгедектігі бар адамдар үшін мынадай әлеуметтік көмек түрлері көзделген: қалалық жолаушылар көлігі маршруттарында тегін жол жүру, екі жылда бір рет тіс протездеу қызметін алу, санация, көмір сатып алуға, газ қазандығын өткізуге және орнатуға жұмсалған шығындарды өтеу. Еңбекке қабілетті жастағы мүгедек адамдар үшін жұмыспен қамтуға жәрдемдесу шарасы да көзделген. Бос орындарға жұмысқа орналастыру, белсенді жұмыспен қамту шаралары. 2023 жылдың 11 айының қорытындысы бойынша 1 288 мүгедек адам жұмыссыздықтан әлеуметтік қорғау шараларымен қамтылды, – деп хабарлады жауапты басқарма басшысының орынбасары.
«Электрондық еңбек биржасы» интернет-порталында (www.enbek.kz) мүгедек адамдарды жұмысқа орналастыру үшін 418 жұмыс орны бойынша 132 бос жұмыс орны орналастырылды.
Ауыр жұмыстарды және еңбек жағдайлары зиянды және қауіпті орындарды қоспағанда, штат санының 2-ден 4%-ға дейінгі мүгедектігі бар адамдар үшін жұмыс орындарына квота белгіленеді.
Есепті кезеңде Астанада 39 бос жұмыс орындары жәрмеңкесі өткізілді, оның ішінде 2-еуі мүгедектігі бар адамдарды жұмысқа орналастыру бойынша арнайы өткізілді.
