Ál-Farabi atyndaǵy Qazaq ulttyq ýniversitetinde Eurasia-Pacific Uninet (EPU) jelisiniń plenarlyq otyrysy jáne Erasmus+ baǵdarlamasy aiasyndaǵy yntymaqtastyqqa arnalǵan seminar ótti, dep habarlaidy dalanews.kz.
Aýqymdy sharaǵa Qazaqstan, Avstriia, Qytai, Qyrǵyzstan, Ózbekstan, Mońǵoliia jáne Úndistan joǵary oqý oryndarynyń basshylary, diplomatiialyq korpýs pen halyqaralyq uiym ókilderi, belgili ǵalymdar men bilim berý jobalarynyń úilestirýshileri qatysty.
Alqaly jiynda QazUÝ-dyń Basqarma Tóraǵasy – Rektor Janseiit Túimebaevtyń quttyqtaý hatyn birinshi prorektor Samǵat Ermekbaev oqyp berdi.
«Ýniversitetterdiń jahandyq rólin arttyrýda halyqaralyq seriktestikti nyǵaitýdyń mańyzy zor. Eurasia-Pacific Uninet jelisi 25 jyldan astam ýaqyt boiy joǵary oqý oryndary, ǵalymdar men oqytýshylar arasyndaǵy tyǵyz bailanysty qamtamasyz etip keledi. Bul – akademiialyq senimge, bilim almasýǵa jáne zamanaýi synaqtardy birlese sheshýge baǵyttalǵan biregei platforma. Sondyqtan búgingi basqosý bilim men ǵylymdy damytýda jańa kókjiekterge jol ashady», – delingen rektordyń quttyqtaý hatynda.
Óz kezeginde Eurasia-Pacific Uninet prezidenti, professor Djozef Shtrobl halyqaralyq akademiialyq jelilerdiń joǵary bilim men ǵylymdy damytýdaǵy róline toqtaldy. Onyń aitýynsha, uzaq merzimdi ári turaqty bailanystar jańa ǵylymi bastamalardy júzege asyrýǵa, zertteýshilerdiń ózara yntymaqtastyǵyn arttyrýǵa jáne ozyq úlgilerdi keńinen taratýǵa múmkindik beredi.
«Búginde bizdiń basty mindetimiz – qalyptasqan seriktestikti jańa deńgeige kóterip, birlesken ǵylymi zertteýler men bilim berý jobalaryn kóbeitý. Osyndai kezdesýler ǵalymdar men stýdentterdiń tájiribe bólisýine, halyqaralyq bastamalarǵa belsene qatysýyna jaǵdai jasaidy», – dedi professor.
Plenarlyq otyrystyń negizgi taqyryby Eýropalyq odaqtyń Global Gateway bastamasy jáne onyń Ortalyq, Shyǵys ári Ońtústik Aziia elderine beretin múmkindikterine arnaldy. Qatysýshylar bul jobanyń ekonomikalyq saiasat pen joǵary bilim berý salasyna tigizer yqpalyn talqylady.
Kezdesýdiń mańyzdy bóligi Avstriiamen akademiialyq bailanystardy tereńdetýge baǵyttaldy. Sarapshylar Erasmus+ baǵdarlamasy arqyly halyqaralyq utqyrlyqty arttyrý joldaryn qarastyryp, Avstriia men óńir elderiniń birlesken jobalaryn júzege asyrý tájiribesin tanystyrdy.
Jiyn aiasynda EPU seriktesteriniń jobalary usynylǵan kórme men joǵary oqý oryndarynyń prezentatsiialyq alańy uiymdastyryldy. Oǵan Avstriianyń 22 ýniversiteti men ǵylymi uiymynyń ókilderi, sondai-aq sheteldik delegatsiialar qatysty.
«Osyndai halyqaralyq alańdardyń basty qundylyǵy – ár eldiń joǵary oqý oryndary arasyndaǵy tikelei bailanysty nyǵaityp, naqty yntymaqtastyq baǵyttaryn aiqyndaýynda. Osy turǵydan alǵanda, Erasmus+ baǵdarlamasy men Eurasia-Pacific Uninet jelisi ýniversitetterimizdiń halyqaralyq keńistiktegi bailanysyn keńeitýge yqpal etedi. Biz Qazaqstannyń joǵary oqý oryndarymen birlesken jobalardy odan ári damytýǵa múddelimiz», – dedi Qyrǵyz memlekettik tehnikalyq ýniversitetiniń prorektory Aqylbek Shymyrov.
Qorqyt Ata atyndaǵy Qyzylorda ýniversitetiniń akademiialyq jumys jónindegi prorektory Dana Ábdirasheva óz sózinde eńbek naryǵynyń talaptaryn alǵa tartty.
«Mundai kezdesýlerdiń basty mindeti – bolashaq birlesken jobalar úshin eýropalyq jáne qazaqstandyq joǵary bilim berý júieleri arasyndaǵy ortaq toǵysý núktelerin tabý. Stýdentterdi tez ózgeretin eńbek naryǵyna daiyndaý máselesi asa ózekti. Qazaqstanda bul mindetti dýaldy oqytý, mikrokvalifikatsiia, óndiristik praktika jáne praktikterdiń bilim berý protsesine qatysýy arqyly sheshýge bolady. Bul quraldardyń barlyǵy ýniversitet pen eńbek naryǵyn jaqyndastyrýǵa, nátijesinde suranysqa ie ári joǵary bilikti mamandardy daiarlaýǵa baǵyttalǵan», – dedi ol.
Aita keteiik, halyqaralyq shara 7-9 qazan aralyǵynda ótýde. Baǵdarlama aiasynda EPU-dyń taqyryptyq jáne óńirlik dóńgelek ústelderi, Erasmus+ baǵdarlamasynyń joǵary bilimdi damytýǵa yqpaly jónindegi talqylaýlar, EPU Bas assambleiasynyń otyrysy, Horizon Europe baǵdarlamasynyń tanystyrylymy jáne Aziiadaǵy joǵary bilim berýdiń bolashaǵyna arnalǵan pikirtalastar uiymdastyrylǵan.
