Astanada Táýelsiz Memleketter Dostastyǵy volonterleriniń I forýmy bastaldy. Qazaqstan Prezidenti Qasym-Jomart Toqaevtyń bastamasymen qolǵa alynǵan forým TMD Úkimet basshylary keńesiniń sheshimi negizinde Dostastyq elderiniń volonterlik bastamalaryn biriktirip, ózara tájiribe almasýyna múmkindik beretin jyl saiynǵy alań retinde quryldy, dep habarlaidy dalanews.kz.
Forýmnyń ashylýynda Aida Balaeva Memleket basshysynyń quttyqtaýyn oqyp berdi. Prezident mańyzdy is-sharanyń Qazaqstannyń bastamasymen Birikken Ulttar Uiymy jariialaǵan Halyqaralyq eriktiler jylynda ótip otyrǵanyna nazar aýdardy. Bul volonterlerdiń áleýmettik, gýmanitarlyq jáne ekologiialyq máselelerdi sheshýdegi orasan zor róliniń halyqaralyq deńgeide moiyndalǵanyn kórsetedi.
«Qazaqstan osy forýmdy ótkizýdi usyna otyryp, TMD elderiniń volonterleri turaqty túrde tájiribe almasyp, ortaq bastamalaryn halyqaralyq deńgeide birlese ilgeriletetin alań qurýdy maqsat etti. Biz úshin dostyqty nyǵaityp, yntymaq, meiirimdilik pen janashyrlyq siiaqty izgi qundylyqtardy qoǵamǵa tereń sińirý airyqsha mańyzdy. Qazaqstanda volonterlik adam áleýetin damytýǵa, azamattyq jaýapkershilikti arttyrýǵa jáne qoǵamda janashyrlyqqa negizdelgen jańa qarym-qatynas mádenietin qalyptastyrýǵa yqpal etip keledi. 1 shildeden bastap kúshine engen jańa Konstitýtsiiada elimizdiń tarihynda alǵash ret volonterlik qyzmetti memlekettik qoldaý eń joǵary quqyqtyq deńgeide bekitildi», – delingen quttyqtaý hatta.
Forýmnyń ashylýynda Aida Balaeva Qazaqstanda volonterlik qozǵalystyń júieli túrde damyp kele jatqanyn atap ótti. Bul baǵyttaǵy mańyzdy kezeńderdiń biri – Prezident Qasym-Jomart Toqaevtyń bastamasymen 2020 jyldyń Volonter jyly bolyp jariialanýy. Sol jyly Memleket basshysy BUU Bas Assambleiasynyń 75-sessiiasynda sóilegen sózinde Damý maqsatyndaǵy volonterlerdi jumyldyrýdyń halyqaralyq jylyn jariialaýdy usynǵan bolatyn. Búginde osy bastamanyń naqty ári aýqymdy nátijesin kórip otyrmyz. Sońǵy alty jylda elimizdegi belsendi volonterler sany alty ese ósip, 50 myńnan 300 myń adamǵa jetti. Volonterlik uiymdar sany úsh ese artyp, 810-ǵa, al volonterlik toptar sany on ese kóbeiip, 3,5 myńǵa jetti.
«Osy jyldar ishinde Qazaqstanda volonterlik qozǵalysty odan ári damytýǵa qajetti júieli negiz qalyptasty. «Volonterlik qyzmet týraly» zań qabyldanyp, qoldaý infraqurylymy damyp keledi, bilim berý jáne granttyq baǵdarlamalar júzege asyrylýda. Endigi mindet – qozǵalystyń aýqymyn keńeitip qana qoimai, volonterlikti qoǵam ómiriniń qoljetimdi ári tabiǵi bóligine ainaldyrý. Volonterlik qaýymdastyqpen birlesip ázirlenip jatqan Volonterlik qozǵalysty damytýdyń 2030 jylǵa deiingi tujyrymdamasy dál osy maqsatqa baǵyttalǵan. Qujatta kásibi jáne salalyq volonterlikti órkendetýge, kóshbasshylar daiarlaýǵa, qoldaý tetikterin jetildirýge jáne zamanaýi tsifrlyq quraldardy paidalanýǵa basymdyq beriledi. Sonyń ishinde ár adamnyń jinaqtaǵan tájiribesin, quzyretteri men qosqan úlesin júieleýge múmkindik beretin volonterdiń tsifrlyq pasportyn ázirleý jumystary júrgizilýde», – dedi Premer-ministrdiń orynbasary.
Sonymen qatar Aida Balaeva búginde 100 myńnan astam azamatty biriktirip otyrǵan ekologiialyq volonterliktiń negizgi baǵyttardyń biri bolyp qala beretinin atap ótti. Bul salanyń órkendeýine jalpyulttyq «Taza Qazaqstan» qozǵalysy airyqsha serpin berdi. Qozǵalys aiasynda 1,5 myńnan astam ekologiialyq is-shara ótkizilip, 2 mln tonnaǵa jýyq qaldyq jinaldy. 2,8 mln gektardan astam aýmaq tazartylyp, 4,5 mln-ǵa jýyq aǵash egildi.
«Kelesi qadam – elderimizdiń volonterlik qaýymdastyqtary arasynda naqty yntymaqtastyq ornatý. Biz birlesken jobalardy damytyp, tiimdi ádis-tásildermen tájiribe almasýǵa, kóshbasshylar men úilestirýshilerdi daiarlaýǵa tiispiz. Sonymen qatar volonterlik tájiribe qoǵam tarapynan laiyqty baǵalanyp, ár adamnyń bilim alýy men kásibi damýynyń bir bóligine ainalýy qajet», – dedi Aida Balaeva.
Osyǵan bailanysty Premer-ministrdiń orynbasary forým qorytyndysy boiynsha ekologiia, áleýmettik jáne inkliýzivti qoldaý, sondai-aq jastar volonterligi baǵyttaryndaǵy birlesken bastamalardyń tizbesin ázirleýdi usyndy.
Alǵashqy jobalardyń biri retinde TMD elderi volonterleriniń qazan aiynda ótetin Aral mańy tabiǵatyn qalpyna keltirý jónindegi halyqaralyq volonterlik aptaǵa qatysýy usynyldy.
Aita keteiik, alǵashqy forýmnyń negizgi taqyryby – «Volonterlik arqyly birlik: seriktestik, senim, damý». Is-sharada ekologiialyq jobalarǵa, inkliýzivti jáne mádeni volonterlikke, sondai-aq TMD keńistigindegi halyqaralyq volonterlik bastamalardy damytýǵa basa nazar aýdaryldy. Eki kúnge sozylatyn forým aiasynda paneldik sessiialar, taqyryptyq pikirtalastar jáne tabysty volonterlik tájiribelerdiń tanystyrylymdary ótedi. TMD volonterleriniń forýmy aldaǵy ýaqytta tájiribe almasýǵa, volonterlik qozǵalysty damytýǵa jáne halyqaralyq yntymaqtastyqty nyǵaitýǵa arnalǵan jyl saiynǵy alańǵa ainalady dep josparlanyp otyr. Forýmdy Dostastyq elderi rotatsiialyq tártippen kezek-kezek ótkizetin bolady.
