Qazaqstanda túngi klýbtarda zańsyz ainalymǵa túsken "kóńil kóteretin gaz" faktileri anyqtaldy, dep habarlaidy Dala News.
Ishki ister ministrliginiń málimetinshe, jyl basynan beri elde azot totyǵy, iaǵni kóńil kóteretin gazdyń zańsyz ainalymyna qatysty qylmystyq jaýapkershilik engizilgen. Atalǵan zat meditsinalyq emes maqsatta qoldanylǵan jaǵdaida adam ómiri men densaýlyǵyna tikelei qaýip tóndiredi.
Narkobizneske qarsy is-qimyl bólimsheleri júrgizgen jedel is-sharalar barysynda birqatar óńirde metall ballondarmen zańsyz tasymaldaý jáne saqtaý derekteri tirkelgen. Atap aitqanda, Shymkent qalasyndaǵy túngi klýbtardyń birinde kóńil kóteretin gazdy satý júieli sipat alǵany anyqtalǵan.
Odan bólek, jedel tekserý kezinde arnaiy qoima tabylyp, onda 416 metall ballon saqtalǵan. Olardyń jartysy azot totyǵymen toltyrylǵan. Qazirgi tańda tárkilengen zattarǵa tiisti saraptama taǵaiyndaldy.
MVD ókilderi kóńil kóteretin gazdy meditsinalyq emes jaǵdaida paidalaný buǵan deiin de adam ólimine ákep soqqanyn eske saldy. Zańsyz ainalymǵa qatysy bar tulǵalarǵa 15 jylǵa deiin bas bostandyǵynan aiyrý jazasy qarastyrylǵan.
Quqyq qorǵaý organdary azamattardyń qaýipsizdigin qamtamasyz etý jáne tyiym salynǵan zattardyń taralýyn boldyrmaý maqsatynda maqsatty reidter men tekserýlerdi jalǵastyratynyn málimdedi.
