AQSh prezidenti Donald Tramp Soltústik Koreia basshysy Kim Chen Ynmen biyl kúzde jeke kezdesý ótkizý múmkindigin talqylap jatyr. Bul týraly The Wall Street Journal basylymy habarlady, dep habarlaidy dalanews.kz.
Basylym málimetinshe, kezdesýdiń yqtimal nusqalarynyń biri – qarasha aiynda Qytaidyń Shenchjen qalasynda ótetin Aziia-Tynyq muhity ekonomikalyq yntymaqtastyǵy (ATES) sammiti aiasynda kelissóz uiymdastyrý.
Degenmen, ázirge bul kezdesýge qatysty resmi daiyndyq jumystary bastalmaǵan. Gazet sarapshylarynyń pikirinshe, Tramptyń Kim Chen Ynmen jańa kelissózder ótkizýge qyzyǵýshylyǵy onyń syrtqy saiasattaǵy eleýli jetistikke qol jetkizý nietimen bailanysty bolýy múmkin. Basylym muny Iranmen bailanysty máselelerde aitarlyqtai nátijeniń bolmaýymen túsindiredi.
Buǵan deiin Tramp Phenianmen qarym-qatynasty jaqsartýǵa baǵyttalǵan birneshe qadam jasaǵan bolatyn. Atap aitqanda, ol AQSh pen Ońtústik Koreianyń birlesken áskeri jattyǵýlarynyń kólemin qysqartýdy tapsyrǵan. Mundai sheshimin Tramp Kim Chen Ynmen aradaǵy «óte jaqsy qarym-qatynasymen» bailanystyrǵan.
The Wall Street Journal basylymynyń jazýynsha, Tramp dál osyndai tásildi óziniń alǵashqy prezidenttik merzimi kezinde de qoldanǵan. Sol kezde ol Soltústik Koreia kóshbasshysymen úsh ret kezdesip, kelissóz júrgizgen.
