Memleket basshysy Tótenshe jaǵdailar ministri Shyńǵys Árinovti qabyldady, dep habarlaidy dalanews.kz.
Qasym-Jomart Toqaevqa vedomstvo jumysynyń nátijesi, azamattyq qorǵanys júiesin jańǵyrtý barysy jáne aldaǵy kezeńge arnalǵan jospar jóninde baiandaldy.
Prezidentke Tótenshe jaǵdailar ministrliginiń materialdyq-tehnikalyq bazasyn nyǵaitý sharalary tanystyryldy. Sońǵy eki jylda bólimsheler 1,4 myńnan astam tehnika, aviatsiia, zamanaýi qutqarý jabdyqtary, ushqyshsyz ushý apparattary jáne bailanys quraldarymen tolyqtyryldy. Bul elimizdiń barlyq óńiriniń tótenshe jaǵdailar kezinde jedel áreket etý múmkindigin aitarlyqtai arttyrdy. Sonymen qatar ministrlikke qarasty bólimshelerdi jańǵyrtý jumystary qolǵa alyndy.
Shyńǵys Árinov bólimsheler jelisin damytý máselesine toqtalyp, jańa ámbebap qutqarý qurylymdary, aviatsiia jáne teńiz jasaqtary qurylǵany jóninde aitty. «Aýyl qutqarýshylary» baǵdarlamasy aiasynda 237 erikti órt sóndirý beketi salynǵan. Olar shamamen 700 eldi mekenniń qaýipsizdigin qamtamasyz etedi.
Halyqty jappai shuǵyl habardar etý júiesin damytý jumystary jalǵasyp, Ahýaldyq ortalyqtyń múmkindikteri keńeitilip jatyr. Sondai-aq tabiǵi órtti erte anyqtaý júieleri biriktirilýde.
Budan bólek, Qasym-Jomart Toqaevqa vedomstvo qyzmetkerlerin áleýmettik qoldaý sharalary týraly málimet berildi. Qutqarýshylarǵa turǵyn úi tólemderi qarastyrylǵan. Tótenshe jaǵdailar ministrliginiń qyzmetkerleri úshin arnaiy turǵyn úi klasterin qurý jobasy qolǵa alyndy. Atalǵan bastama órt sóndirý bólimderi men qutqarý bazalarynyń janynda qajetti infraqurylymy bar turǵyn úi keshenderin salýdy kózdeidi.
Prezident ministrliktiń azamattyq qorǵaý júiesin jetildirý boiynsha atqaryp jatqan jumysyn oń baǵalady.
Memleket basshysy jergilikti atqarýshy organdarmen birlese otyryp, aýdandyq jáne aýyldyq qutqarý bólimsheleriniń materialdyq-tehnikalyq bazasyn nyǵaitý is-sharalaryn jalǵastyrý, zamanaýi tehnologiialar engizý jáne órt qaýipsizdigi deńgeiin kóterý jóninde tapsyrma berdi.
