Memleket basshysy buqaralyq aqparat quraldary ókilderine brifing ótkizdi, dep habarlaidy dalanews.kz.
– Qasym-Jomart Kemeluly, jýyrda Konstitýtsiialyq sot jariialaǵan túsindirmege sáikes sizdiń Memleket basshysy retinde Prezident laýazymyna qaita sailanýǵa quqyǵyńyz bar eken. Bul jańalyq qoǵamdy eleń etkizdi. Siz óz quqyńyzdy paidalanyp, 2029 jylǵy Prezident sailaýyna túsýdi josparlap otyrsyz ba? Prezident sailaýy 2029 jyly óte me, álde kezekten tys sailaý bolýy múmkin be?
– Konstitýtsiialyq sot osyndai sheshim qabyldady. Álbette, zań júzinde meniń qaita sailanýǵa quqyǵym bar. Biraq aldaǵy ýaqytta sailaý ótkizýge jáne oǵan qatysatynym nemese qatyspaitynym týraly sóz qozǵaýǵa áli erte. Biz elimizdiń aldynda turǵan aýqymdy mindetterdi eńserýimiz kerek. Tutas Qazaqstandy úlken qurylys alańyna ainaldyryp, eń aldymen, azamattarǵa arnalǵan áleýmettik nysandar salýymyz qajet. Bul maqsatqa Ulttyq qordyń qarjysyn paidalanýǵa daiynmyn. Halyqtyń igiligine jarata almasaq, qarajatty shetelderde qundy qaǵaz retinde ustap otyrýdyń qajeti qansha? Qarjyny jai ǵana ustap otyrýǵa qarsymyn. Qarajat halqymyzdyń, azamattarymyzdyń igiligine qyzmet etýi kerek. Árine, álemdegi jaǵdaiǵa basa nazar aýdarýymyz, jan-jaqty taldaýymyz qajet. Ózderińiz bilesizder, geosaiasi ahýal kúrdeli. Buralań jolmen júrgenimizge qaramastan, el ishinde beibitshilikti saqtap, damýǵa qarai bet alyp kelemiz. Ekonomikalyq ósim anyq baiqalady. Muny negizgi halyqaralyq qarjy institýttarynyń baǵasy da rastady. Aldaǵy ýaqytta taǵy jolyǵarmyz. Bálkim, kelesi jyly... Sol kezde sizge naqty jaýap beremin.
