Saiasattanýshy Dosym Sátbaev Smaiylov Úkimeti men jańa premerdiń taǵaiyndalýyna bailanysty pikir bildirdi. Osy tusta ol Bektenovtiń eski júie negizinde jańa qyzmetke kelgenin alǵa tartty, dep habarlaidy Dalanews.kz.
“Bul - mańyzdy sát. Bul da Nazarbaev júiesiniń belgilep ketken bir qaǵidasy. Toqaev qazir osy qaǵidalardy jalǵastyrý ústinde. Óitkeni jańa premer-ministrdiń mansaptyq ósýi Qańtar oqiǵasynan keiin bastalǵanyn baiqaýǵa bolady. Iaǵni, dál osy oqiǵa memlekettik apparatty tazartýǵa túrtki boldy. Sol kezde Toqaevty qoldaǵan belgili bir adamdar toby tóbe kórsetti. Al Toqaev óz kezeginde olardy belgili bir laýazymǵa jaiǵastyrdy” - deidi saiasattanýshy.
Sátbaevtyń aitýynsha, Oljas Bektenov osy toptyń múshesi. Óitkeni Qańtar oqiǵasynan keiin sheneýnik birden Sybailas jemqorlyqqa qarsy is-qimyl agenttiginiń tóraǵasy laýazymyna taǵaiyndalyp, keiin Prezident Ákimshiliginiń basshylyq qyzmetine keldi.
“Bul onyń Antikor basshysy retinde atqarǵan jumysyna marapaty boldy. Óitkeni 2022 jyly Tuńǵysh prezidenttiń týystary men kei oligarhtarǵa qysym kórsetý bastaldy. Olar bas bostandyǵynan aiyrylyp, tipti túrmege qamaldy. Toqaevqa qazirgi premer-ministrdiń osyndai belsendi jumysy unady. Nátijesinde onyń mansaptyq ósýi jalǵasyn tapty. Al prezident ákimshiliginiń basshysy bolǵan ýaqytta ol zańsyz shetel asqan aktivterdi qaitarýǵa bailanysty zańnyń qabyldanýyn qadaǵalady. Atalmysh zań ótken jyldyń jaz aiynda qabyldanǵan bolatyn”, - dedi Dosym Sátbaev.
Sarapshynyń aitýynsha, eks-premer Álihan Smaiylov 2022 jyly jeltoqsan aiynan bastap synǵa ushyrady. Osy sátte Smaiylovtyń tarapyna “ekonomikalyq saiasatqa qaýqary jetpei jatyr” degen pikirler aityla bastady. Alaida ol otstavkaǵa ketpedi. Kerisinshe úkimette kadrlyq ózgerister boldy. Al 2023 jyly naýryzda ótetin parlamenttik sailaýdan keiin úkimettiń otstavkaǵa ketýi kútildi. Biraq bul da júzege aspady.
2022 jyly jeltoqsanda Smaiylov qatty synǵa ushyrady. Bul synaq eki jyl ishinde onyń eńsesin aitarlyqtai túsirdi. Alaida bul sátsizdikterge Smaiylov qana kináli emes edi. Buǵan birtutas memlekettik júie retinde búkil memlekettik apparat pen ákimder de jaýapty boldy.
“Biraq bul dástúr Nazarbaev tusynan beri jalǵasyn taýyp keledi. Iaǵni, premer-ministrdi otstavkaǵa jiberý, úkimettegi kadrlyq aýys-túiister arqyly áleýmettik shielenistiń deńgeiin tómendetýge tyrysady. Osylaisha halyqty “kináli tarapty jazalap, jańa kandidatty usynyp jatyrmyz” dep jubatyp qoiatyn”, - dedi saiasattanýshy.
Dosym Sátpaev jańa premer-ministrge qatysty jazylyp jatqan maqalalarǵa da nazar aýdardy.
“Iá, maqtaýǵa turarlyq jan. Uiymdastyrýshylyq qabiletine de senim artýǵa bolady. Alaida bul qyzmetke kelýi úshin daiyndyq aldyn ala jasalǵandai. Bul óz kezeginde alańdaýshylyq týdyrady. Óitkeni biz Eski Qazaqstannyń lebi áli de esip turǵanyn kórip otyrmyz”, - dedi ol.
Saiasattanýshy sońǵy onjyldyqta eshbir premer-ministrdiń komandasy bolmaǵanyn atap ótti. Bul sáikesinshe kez kelgen ekonomikalyq jobany júzege asyrýda úlken kedergi keltiretinin jetkizdi. Onyń oiynsha, jańa premer-ministr de osy másele boiynsha burynǵy basshylardyń kúiin keshýi múmkin. Sebebi oǵan birinshi kedergi - úkimette pikirles adamdar men reformatorlardyń boi kórsetpeýi. Ekinshi kedergi - aimaqtardaǵy úlken ekonomikalyq sátsizdikter.
"Barlyǵy qaitadan adamdy talqyǵa salyp jatqanyn kórip jatyrmyz. Bul - qate kózqaras. Olar adamdy emes, baǵdarlamany talqylaýy qajet. Ol usynatyn ekonomikalyq modelge nazar aýdarý kerek. Óitkeni ótken jyly Toqaev ýáde etken jańa ekonomikalyq model usynylmady. Al ekinshi mańyzdy másele, bizge adamdardy arnaiy talqylaýdyń qajeti joq. Biz basqarý júiesin talqylaýymyz kerek” – deidi Dosym Sátbaev.
Sátbaevtyń aitýynsha, Álihan Smaiylovtyń tusynda infliatsiia ósip, kedeishilik deńgeii artty. Sonymen qatar biýdjet tapshylyǵy da oryn aldy.
“Osy eki jyl ishinde qalai alyp qarasańyz da barlyq jerde sátsizdikter boldy”, - dep túiindedi saiasattanýshy.
