Memleket basshysy buqaralyq aqparat quraldary ókilderine brifing ótkizdi, dep habarlaidy dalanews.kz.
– Siz konstitýtsiialyq reforma tarihi ózgeristerdiń bastamasy ekenin, al túbegeili jańǵyrtý jyl sońyna deiin, tipti, kelesi jyly da jalǵasatynyn aitqan edińiz. Quryltai men Qazaqstan Halyq Keńesi iske kirisip, Vitse-Prezident laýazymy taǵaiyndalǵannan keiin elde qandai ózgerister bolady?
– Jurttyń bári Vitse-Prezident laýazymy týraly surap jatyr. Rasynda, bul – aitýly ózgeris. Biz Konstitýtsiiamyzǵa jańa laýazymdy ádeii engizdik. Bul laýazym asa qajet dep aitsaq, qatelespeimiz. Sebebi qazirgi bulyńǵyr zamanda mundai laýazym elimizge óte qajet. Kelesi aptada nemese on kún ishinde Vitse-Prezident kim ekeni málim bolady. Men ony qazir anyq aita almaimyn. Ol belgili, sizder jaqsy biletin adam bolady dep oilaimyn.
Taǵy basqa reformalardy iske asyramyz. Mysaly, Halyq Keńesiniń jumysyn jandandyrý qajet. Halyq Keńesi degenimiz – jańa organ. Keibir azamattar Assambleia týraly surap jatyr eken. Halyq Keńesi Assambleianyń atqarǵan qyzmetin odan ári kúsheitedi dep oilaimyn. Bul kópfýnktsionaldy, jańa saiasi tetik dep aitýǵa bolady. Sondyqtan Keńestiń jumysy jemisti bolatynyna kámil senemin. Jalpy, josparymyz óte aýqymdy. Osyǵan deiin aitqanymdai, Qazaqstan úlken qurylys alańyna ainalýy kerek. Ár oblys ortalyǵynda nemese aýdandar men qalalarda iri qurylystar júrgiziledi. Emhanalar, balalarǵa arnalǵan ońaltý ortalyqtary, basqa da nysandar salynady. Astanada jańa kópir, Dombyra saraiy, Sý resýrstaryn zertteý ortalyǵy sekildi mańyzdy nysandar boi kóteredi. Qalalardy abattandyrý kerek. «Taza Qazaqstan» aktsiiasyn oidaǵydai jalǵastyrý qajet. Sondyqtan qol qýsyryp otyrýǵa bolmaidy. Bárimiz bir el bolyp iske kiriskenimiz jón. Bizdiń Qazaqstannan basqa Otanymyz joq, Otan úshin bárimiz kúsh salýymyz kerek. Jalpy, saiasi naýqan jaqsy ótti. Sebebi jurt aldyna jańa tulǵalar shyqty, utymdy ideialar aityldy. Bul Quryltai elimizdiń damýyna tyń serpin beredi dep oilaimyn.
