Almaty oblystyq politsiia departamenti bastyǵynyń mindetin atqarýshy Serik Shalqarov Talǵardaǵy jappai tóbeleske qatysty suraqtarǵa jaýap berdi, - dep habarlaidy Dalanews.kz Massaget.kz-ke siltep.
Shalqarovtyń sózinshe, tóbeles arasynda júrgen eki qyz qorǵaýǵa quqyǵy bar kýáger retinde tanylǵan.
"Tergeý amaldary júrgizilip jatyr. Sonyń sheshimin kútemiz", - deidi Serik Shalqarov.
Ol Sherzattyń soqqyǵa jyǵylyp jatqany kórsetilgen video zerttelip jatqanyn jetkizdi.
"Arnaiy top qurylyp, olardyń árqaisy istegen áreketine zańdy sheshim berilip jatyr. Sebebi videoda artynan kim ekenin tani almaisyz. Sondyqtan árqaisy tergeýden ótedi. Ol úshin biraz ýaqyt ketedi. Qazirgi tańda jumystyń jartysynan kóbin bitirdik. Al beinekameralarǵa túsip qalǵan sátter óshirildi degen jalǵan aqparat. Tergeýshiler videolardy resmi alyp, zerttep jatyr", - deidi Serik Shalqarov.
Sonymen qatar, Shalqarov tóbelesten keiin qansha qarý tárkilengenin aitty.
"Qazirgi tańda úsh pyshaq tárkilendi. Onyń ekeýi as úi pyshaǵy. Sondai-aq bir myltyq bar. Qarý eshqaida tirkelmegen. Departament ony saraptamadan ótkizip jatyr", - deidi Serik Shalqarov.
Aita keteiik, 4 qazanǵa qaraǵan túni Talǵarda jantúrshigerlik qylmys boldy. Qolynda pyshaq pen qarýy bar bir top jigit 16 jastaǵy Sherzat, ákesi men aǵasyna shabýyl jasaǵan.
Sherzattyń ákesi jalǵa dúken alyp, saýda jasaýmen ainalysatyn. Arty ólimmen aiaqtalǵan tóbeles osy dúkennen bastalǵan. Bir jigit dúkenge kelip, syra alyp, aqshasyn tólemei kete barǵan. Sherzattyń ákesi syranyń aqshasyn tóleýdi talap etken kezde janjal týyndaǵan.
Sherzat osy sátte klienttiń dúkennen shyǵyp ketýin suraǵan. Biraq syra alǵan jigit dostaryna qońyraý soǵyp, dúkenge úsh kólikpen bir top jigit kelgen. Bir top jigit Sherzatty tepkilei bastaǵan. Bul sátti turǵyndar videoǵa túsirip alǵan. 10-synypta oqityn Sherzat ata-anasynyń dúkenine kezdeisoq kelgen. Sýyq qarýmen kelgen buzaqylar eshkimdi aiamapty. Qansyraǵan bir otbasynyń músheleri aýrýhanaǵa jetkizilgen. Kóp uzamai Sherzat jansaqtaý bóliminde kóz jumǵan.
Qaza tapqan jigittiń ata-anasy politseiler oqiǵaǵa qatysty adamnyń bárin ustamaǵanyn aityp, dabyl qaqqan.
Almaty oblysynyń politsiia departamenti kámeletke tolmaǵan balany óltirý faktisi boiynsha politsiia qylmystyq is qozǵaǵanyn habarlady. Oqiǵanyń barlyq qatysýshylary ustaldy jáne ýaqytsha ustaý izoliatoryna qamaldy.
Oblystyq prokýratýra ókilderi bul oqiǵa jiti baqylaýda ekenin habarlady.
