Sátbaev ýniversiteti ǵylymi ázirlemelerdi naqty óndiriske engizý jáne otandyq innovatsiialyq qurylys materialdarynyń óndirisin óńirlerde damytý baǵytyndaǵy jumystaryn jalǵastyrýda. Búgin ýniversitette Sátbaev ýniversiteti, «Diatomite» óndiristik kompaniiasy jáne joba investory arasynda strategiialyq yntymaqtastyq týraly memorandýmǵa qol qoiyldy, dep habarlaidy dalanews.kz.
Qujat aiasynda taraptar Sátbaev ýniversitetinde ázirlengen ǵylymi-tehnologiialyq sheshimderdi ónerkásiptik deńgeige shyǵaryp, olardy óńirlik óndiriste qoldaný múmkindikterin qarastyrady. Atap aitqanda, Jambyl oblysynda, Taraz qalasynda Diatomite brendimen innovatsiialyq qurylys materialdaryn, onyń ishinde qurǵaq qurylys qospalaryn óndiretin óndiristi iske qosý jobasyn birlesip pysyqtaý josparlanyp otyr.
Aldaǵy kezeńde taraptar óndiristik alańdy anyqtaý, shikizat bazasy men injenerlik infraqurylymnyń múmkindikterin baǵalaý, óndiristik qýatty belgileý, biznes-model men jol kartasyn ázirleý, sondai-aq óndiristi iske qosý kezeńderin aiqyndaý baǵytynda jumys júrgizedi. Jobanyń negizgi maqsaty – otandyq ǵylymi ázirlemelerdi naqty óndiristik úderisterge engizý arqyly qurylys indýstriiasy úshin zamanaýi ári básekege qabiletti materialdar óndirisin damytý.
Seriktestiktiń ár qatysýshysy jobaǵa óz quzyreti men tájiribesine sáikes úles qospaq. Sátbaev ýniversiteti ǵylymi-tehnikalyq súiemeldeýdi qamtamasyz etip, ýniversitet ǵalymdary ázirlegen tehnologiialyq sheshimderdi usynady. «Diatomite» óndiristik kompaniiasy óndiristik noý-haý, tehnologiialyq reglamentter, mamandardy oqytý jáne ónim sapasyn tehnologiialyq súiemeldeý baǵyttaryna jaýap beredi. Al joba investory jobanyń investitsiialyq, óndiristik jáne infraqurylymdyq bóligin qamtamasyz etýge atsalysady.
Sátbaev ýniversitetiniń rektory Meiram Begentaevtyń aitýynsha, ǵylymi ázirlemelerdiń naqty ekonomikaǵa engizilýi zamanaýi ýniversitettiń mańyzdy mindetteriniń biri.
«Biz úshin ǵylymnyń nátijesi zerthananyń ishinde nemese ǵylymi jariialanym betinde ǵana qalmaýy mańyzdy. Ǵalymnyń ideiasy naqty tehnologiiaǵa, tehnologiia – óndiriske, al óndiris – qoǵamǵa qajetti ónimge ainalǵan kezde ǵana ǵylymnyń áleýeti tolyq ashylady. Sondyqtan biz ýniversitette jasalǵan ǵylymi ázirlemelerdi naqty óndiriske engizýge jáne olardy óńirlerde masshtabtaýǵa erekshe mán beremiz. Bul rette stýdentter men jas ǵalymdar úshin de úlken múmkindik qalyptasady: olardyń ǵylymi izdenisteri naqty óndiristik mindetterdi sheshýge baǵyttalyp, el ekonomikasyna úles qosa alady», – dedi Meiram Begentaev.
Ýniversitet basshylyǵy bul jobany ǵylym men óndiristiń bailanysyn nyǵaitatyn mańyzdy bastamalardyń biri retinde qarastyrady. Óitkeni ǵylymi jumystyń qundylyǵy onyń teoriialyq nátijesimen ǵana emes, naqty ómirde qoldanylýymen de ólshenedi. Ýniversitet qabyrǵasynda ázirlengen tehnologiianyń óndiristik deńgeige shyǵýy – ǵylymi ideianyń qoǵam igiligine qyzmet ete alatynyn kórsetetin naqty mysal.
Bul bastama bilim alýshylar men jas zertteýshiler úshin de mańyzdy motivatsiialyq mánge ie. Stýdenttiń, magistranttyń nemese jas ǵalymnyń zertteýi ǵylymi maqala nemese dissertatsiia aiasynda qalyp qoimai, bolashaqta jańa tehnologiiaǵa, ónimge nemese óndiristik jobaǵa ainalýy múmkin. Osy turǵydan alǵanda, búgingi seriktestik jas býynǵa ǵylymmen ainalysýdyń praktikalyq mańyzyn kórsetip, óz zertteýlerin naqty óndiristik máselelermen bailanystyrýǵa jańa múmkindikter ashady.
«Ǵylymnan óndiriske» qaǵidaty Sátbaev ýniversitetiniń ǵylymi-tehnologiialyq damý baǵyttarynyń biri bolyp otyr. Ýniversitet otandyq ǵylymi ázirlemelerdi kommertsiialandyrýǵa, óndiris oryndarymen seriktestikti kúsheitýge jáne ǵylymi nátijelerdi el ekonomikasynyń naqty sektorlaryna engizýge basymdyq beredi.
Tarazda innovatsiialyq qurylys materialdaryn óndiretin jańa óndiris ashý jónindegi joba da osy maqsatqa baǵyttalǵan. Onyń júzege asýy óńirde jańa óndiristik múmkindikter qalyptastyrýǵa, otandyq qurylys materialdarynyń úlesin arttyrýǵa, ǵylymi-tehnologiialyq ázirlemelerdi kommertsiialandyrýǵa jáne bilikti mamandar úshin jańa kásibi múmkindikter jasaýǵa yqpal etýi múmkin.
Sátbaev ýniversiteti úshin bul bastama ǵylymi ideianyń zerthanadan óndiristik alańǵa deiingi jolyn kórsetetin mańyzdy tájiribe. Ýniversitettiń basty maqsaty bilim men ǵylymdy óndiristiń naqty qajettilikterimen ushtastyryp, Qazaqstannyń tehnologiialyq damýyna úles qosatyn jobalardy kóbeitý.
Búgingi memorandým osy baǵyttaǵy jumystardyń kezekti qadamy. Ǵylymi izdenis pen óndiristik tájiribe, ýniversitettik bilim men biznes múmkindigi bir arnaǵa toǵysqan jaǵdaida otandyq tehnologiialardyń básekege qabilettiligin arttyrýǵa jáne jańa óndiristerdi qalyptastyrýǵa múmkindik mol. Eń bastysy, bul Qazaqstanda jasalǵan ǵylymi ideialardyń Qazaqstan ekonomikasynda naqty ónimge ainalýy úshin jasalǵan taǵy bir mańyzdy qadam.
