Saparbaev imamdardyń basqa aǵymdaǵylarǵa sózi ótpeitinin moiyndady
Astanadan prezident atynan kelgen Muhtar Abraruly din ókilderiniń eldi aýzyna qaratatyndai sózi óktem, ózi batyl bolý kerektigin eskertti.
«Biz 70 jyl dinsiz qoǵamda ómir súrgenbiz. Sondyqtan halyqtyń aldynda batyl bolý kerek. Dini kósem sizdersizder, osy artyqshylyqtaryńyzdy únemi paidalanyńyzdar. Qalai qoshtasýdy aityp turǵan kezde ózimizdiń dinimizdi aitý kerek. Ana jyly Atyraýda áke-sheshesiniń ziratyn túsirip tastaǵandar týraly bilemiz. Sondai bolmaý úshin úiretý kerek. Qurmetti aǵaiyn, elbasy barlyq jaǵdaidy baqylaýynda ustap otyr», – dedi Muhtar Qul-Muhammed.
Aqtóbe oblysynyń ákimi Bas múftidiń kózinshe imamdardyń saýatsyz ekenin qynjyla aitty. Senimdi sóilei almai júrgen din ókilderine kúmánmen qarady.
«Eń negizgi jumys Keńqiiaq, Shubarshi aýyldarynda. Osynda lańkestik jasap júrgen jigitterdiń kóbisi jas balalar. Búlik jasaǵandardyń bári meshitke bardy, bárin sizder bilesizder. Aqtóbe qalasynyń imamdary sony jasyrady. Shynyn aitý kerek, olarmen durys sóilese almaidy. Sebebi saýat nashar. Múmkin solardyń aldynda men shynyn aitsam, táýeldi me dep qorqam. Eger solarmen jumys bolsa, mynadai jaǵdai bolmas edi», – dedi Berdibek Saparbaev.
Aqtóbelik imamdar ózderinen qateliktiń ketkenin joqqa shyǵarmady. Aiyptaryn moiyndap, keshirim surady.
«Men Qazaqstannyń oblystaryn aralaǵan kezde imamdardyń jaǵdaiy qalai eken, turmysy qandai eken degendi qarap júremin. Qazaqstannyń barlyq oblystarymen salystyrǵanda áleýmettik jaǵdai barynsha jaqsy sheshilgeni osy Aqtóbe óńiri», – dedi Muhtar Qul-Muhammed.
Meiilinshe jaǵdaiy jasalyp jatqan Aqtóbe óńirinde imamdar turaqtaǵan emes. Ásirese, baqylaýda otyrǵan aýdan imamdary «otbasy jaǵdaiyma bailanysty» dep tura qashyp jatady. Oblystyń bas imamynyń ózi bir ai buryn aýysqan. Osyǵan deiin otyrǵan Nurlan Baijigituly óńirdegi jaǵdaidy ashyp aita bastaǵanda bas imamdyqtan alyndy.
BAQ ókilderine suqbat bergen Nurlan qajy Aqtóbede 2000-nan asa adasqandardyń baryn aityp, jaǵa ustaǵan bolatyn. Ol mektep oqýshylarynyń ózi saqal qoiyp, teris aǵymǵa boi aldyrǵanyn dabylmen aitqan edi.
