«Qazaqmys korporatsiiasy» JShS Basqarma tóraǵasy Rýslan Óskenáli Jezqazǵan qalasyndaǵy áleýmettik, bilim berý jáne mádeniet salalaryndaǵy birqatar mańyzdy nysandy aralap, jobalardyń iske asyrylý barysyn tekserdi. Sapar barysynda jumystardyń qazirgi qarqynyna, belgilengen merzimderdiń saqtalýyna jáne qurylys sapasyna basa nazar aýdaryldy, dep habarlaidy dalanews.kz.
Aldymen «Ulytaý ýniversiteti» KEAQ-tyń infraqurylymyn damytý jumystary qaraldy. Rýslan Óskenáli ýniversitet aýmaǵyndaǵy qurylys barysymen tanysty. Joǵary oqý ornyn damytý óńir úshin qajetti bilikti mamandardy, sonyń ishinde taý-ken salasyna qajet tehnikalyq kadrlardy daiarlaýǵa múmkindik beredi. Ýniversitettiń bilim berý qyzmetin 2026 jylǵy 1 qyrkúiekte bastaý josparlanǵan. Alǵashqy qabyldaý paidaly qazbalardy óndirý jáne barlaý baǵyttary boiynsha bakalavriat baǵdarlamalaryna júrgiziledi.
Budan keiin «Jastar» qalalyq saiabaǵyndaǵy qaita jańǵyrtý jumystarynyń barysy tekserildi. Jobany iske asyrýǵa 4,9 mlrd teńge bólingen. Saiabaq aýmaǵynda jaiaý júrginshiler men velosiped joldaryn, sýburqaq, balalar oiyn alańdaryn jáne basqa da zamanaýi infraqurylym nysandaryn salý josparlanǵan.
Qazirgi tańda saiabaqtaǵy demontaj jumystary aiaqtalyp, abattandyrýǵa qajetti aýmaqty daiyndaý jumystary júrgizilýde.
Rýslan Óskenáli jaýapty taraptarǵa jumystardyń qarqynyn saqtap, jobany belgilengen merzimde aiaqtaýdy tapsyrdy.
Sondai-aq Basqarma tóraǵasy S. Qojamqulov atyndaǵy Qazaq mýzykalyq-drama teatryndaǵy kúrdeli jóndeý jumystarynyń barysymen tanysty. Quny 5,1 mlrd teńge bolatyn joba teatrdyń sáýlettik jáne tarihi kelbetin saqtai otyryp, sahnalyq jáne injenerlik infraqurylymdy jańartýdy kózdeidi. Nysandy aralaý kezinde qurylys jumystarynyń sapasy men bekitilgen jumys kestesiniń saqtalýyna erekshe kóńil bólindi.
Sondai-aq, Rýslan Óskenáli salynyp jatqan Ortalyq meshit pen Keńgir sý qoimasy jaǵalaýynyń abattandyrylyp jatqan aýmaǵyn da kórdi. Qazirgi ýaqytta jaǵalaýdy abattandyrýdyń ekinshi kezeńi aiasynda aýmaqty josparlaý jumystary júrgizilýde. Joba tolyǵymen «Qazaqmys korporatsiiasy» JShS-niń qarajaty esebinen júzege asyrylýda. Jobanyń jalpy quny – 3,4 mlrd teńge.
Sapar qorytyndysy boiynsha Rýslan Óskenáli jaýapty bólimsheler men merdiger uiymdardyń basshylaryna qurylys sapasyna baqylaýdy kúsheitýdi, bekitilgen jumys kestesin qatań saqtaýdy jáne jobalardy belgilengen merzimde aiaqtaýdy tapsyrdy.
Áleýmettik jobalardyń iske asyrylý barysy kompaniia basshylyǵynyń turaqty baqylaýynda.
Qalalyq jáne áleýmettik infraqurylymdy damytý – «Qazaqmystyń» qatysý óńirlerindegi mańyzdy baǵyttardyń biri. Kompaniia bilim berý, mádeniet jáne qoǵamdyq keńistikterdi damytýǵa baǵyttalǵan jobalardy júieli túrde iske asyryp, óńirlerdegi infraqurylymdy odan ári jańǵyrtýǵa investitsiia salýdy jalǵastyrady.
