Quryltai sailaýynda Almaty oblysyndaǵy sailaý ýchaskelerinen ádette sport arenalarynda, ringterde jáne halyqaralyq jarystarda kórip júrgen sportshylardy kezdestirýge bolady. Álem chempiondary, Olimpiada júldegerleri men ulttyq quramalardyń kóshbasshylary sailaýǵa qatysyp, óz tańdaýyn jasady, dep habarlaidy dalanews.kz.
Sailaýshylar sport juldyzdaryn kútpegen jerden de kezdestirdi. Ulttyq boks quramasynyń sailaý ýchaskesine kelýi kópshilik úshin naǵyz tosynsyi boldy. Biraq bul týraly keiinirek. Al ázirge el úshin mańyzdy kúni jankúierlerin qýantyp qana qoimai, azamattyq tańdaýyn jasaǵan sportshylardy eske alaiyq.
Olimpiada júldegeri Demeý Jadyraev
Óz azamattyq boryshyn grek-rim kúresinen Qazaqstan ulttyq quramasynyń kóshbasshylarynyń biri, 2024 jylǵy Parij Olimpiadasynyń kúmis júldegeri Demeý Jadraev ta oryndady.
Balaýsa Mýzdiman
Daýys bergenderdiń qatarynda halyqaralyq dárejedegi sport sheberi Balaýsa Mýzdiman da bar. Ol 2023 jyly kásipqoi boksqa aýysyp, bir jyldan keiin Tailandta WBA Asia belbeýin jeńip aldy.
Asem Orynbai
Óz tańdaýyn stend atýdan Qazaqstan ulttyq quramasynyń kóshbasshysy, Aziia oiyndarynyń chempiony jáne álem kýbogynyń rekordshysy Asem Orynbai da jasady. Nátije úshin barynsha zeiin men jaýapkershilik tanytýǵa úirengen sportshy bul qasietterin mańyzdy kúni de kórsetti.
Nazym Qyzaibai
Bokstan úsh dúrkin álem chempiony ári Olimpiadanyń qola júldegeri Nazym Qyzaibai Jańashar aýylynda daýys berdi. Sportshy oqý-jattyǵý jiynynda júrgenine qaramastan, Quryltai sailaýyn ótkizip almaý úshin aldyn ala esepten shyǵarý kýáligin alyp qoiǵan.
Shavkat Rahmonov
Qazaqstandyq aralas jekpe-jek sheberi Shavkat Rahmonov Qonaiev qalasyndaǵy №949 sailaý ýchaskesine keldi. Qazaqstannyń MMA salasyndaǵy eń tanymal ókilderiniń biri de Quryltai depýtattaryn sailaýǵa qatysty.
Boks chempiondary — ringten sailaý ýchaskesine
Al Esikte sailaýshylar naǵyz sporttyq desantty kezdestirdi. №123 sailaý ýchaskesine Qazaqstannyń ulttyq boks quramasynyń ókilderi keldi.
Olardyń qatarynda Sanjar Tashkenbai, Mahmud Sabyrhan, Sáken Bibosynov, Serik Temirjanov, Orazbek Asylqulov, Tórehan Sabyrhan, Abylaihan Júsipov, Sabyrjan Aqqalyqov, Nurbek Oralbai, Saǵyndyq Tokambai, Aibek Oralbai jáne basqa da sportshylar boldy.
Qazir ulttyq qurama Almaty oblysynda oqý-jattyǵý jiynyn ótkizip jatyr. Daiyndyq kestesine qaramastan, boksshylar daýys berýge qatysty. Sailaýshylar kútpegen kezdesýdi paidalanyp, sportshylarmen estelik sýretke túsip, olarǵa jańa jeńister tiledi.
Bul kúni medaldar men chempiondyq ataqtar sailaý ýchaskesiniń syrtynda qaldy. Munda sportshylar jarysqa qatysýshylar retinde emes, óz tańdaýy men nátijesine jaýap berýge daǵdylanǵan el azamattary retinde daýys berdi.
