Resei Ulybritaniiaǵa Ýkrainaǵa jetkizilgen drondardyń Resei aýmaǵyndaǵy nysandarǵa jasalǵan shabýyldarda qoldanylýyna bailanysty «saldary bolatynyn» eskertti., dep habarlaidy dalanews.kz.
Reuters agenttiginiń málimetinshe, Reseidiń Londondaǵa elshiligi Ulybritaniialyq The Times gazetinde jariialanǵan materialǵa jaýap bergen. Basylymnyń málimetinshe, Ýkraina alǵash ret Resei aýmaǵyna jasalǵan uzaq qashyqtyqtaǵy soqqylar kezinde britandyq kompaniialar shyǵarǵan drondardy paidalanǵan.
Resei elshiligi Ulybritaniianyń Ýkrainaǵa áskeri qoldaý kórsetýi Máskeý men London arasyndaǵy teketiresti odan ári kúsheitip jatqanyn málimdedi. Diplomatiialyq ókildik Ulybritaniianyń Ýkrainaǵa áskeri kómek kórsetýi úshin jaýap beretinin aityp, Londonnyń qaqtyǵysqa aralasýy artqan saiyn onyń «baǵasy da joǵarylaitynyn» eskertti.
Máskeý Ýkraina sońǵy ýaqytta Resei aýmaǵyndaǵy munai óńdeý zaýyttary men logistikalyq nysandarǵa uzaq qashyqtyqqa ushatyn drondar arqyly soqqy berip jatqanyn alǵa tartady. Mundai shabýyldardyń maqsaty Reseidiń áskeri-ónerkásiptik áleýeti men soǵysqa qajetti infraqurylymyna qysym jasaý bolyp otyr.
Reuters málimetinshe, Ulybritaniia Qorǵanys ministrligi Ýkrainadaǵy shabýyldarda britandyq drondardyń naqty qoldanylǵanyn rastamady. Alaida vedomstvo Kievti qoldaý jalǵasatynyn málimdedi.
«Ulybritaniia Ýkrainamen birge jáne eldiń ózin qorǵaýy úshin qajetti qural-jabdyqtardy berýge mindetti», – dep málimdedi Ulybritaniia Qorǵanys ministrliginiń ókili.
Buǵan deiin maýsym aiynda Ulybritaniia Ýkrainaǵa 2026 jyldyń sońyna deiin 150 myń dron jetkizetinin jariialaǵan. Bul maqsatqa arnalǵan qarjylandyrý kólemi 752 mln fýnt sterlingti, iaǵni shamamen $996 mln quraidy.
Ulybritaniianyń Ýkrainaǵa áskeri kómegi Resei men Batys arasyndaǵy shielenistiń negizgi máseleleriniń birine ainalyp otyr. Máskeý buǵan deiin de Ýkrainaǵa qarý-jaraq jetkizetin Batys elderin qaqtyǵysqa tikelei aralasý qaýpin arttyryp otyr dep birneshe ret eskertken.
Bul joly Reseidiń Ulybritaniiaǵa jasaǵan eskertýi britandyq óndiristegi drondardyń Resei aýmaǵyndaǵy alys nysandarǵa soqqy berý úshin qoldanylǵany týraly aqparat taraǵannan keiin jasaldy.
