«Quzyrettilik ortalyǵynda» «Mereili otbasy – 2026» ulttyq baiqaýynyń oblystyq kezeńin qorytyndylaýǵa arnalǵan saltanatty shara ótti. Oǵan oblys ákimi Murat Ergeshbaev, oblystyq máslihat tóraǵasy Murat Tleýmbetov, ziialy qaýym ókilderi men qoǵamdyq uiymdardyń belsendileri qatysty, dep habarlaidy dalanews.kz.
Aimaq basshysy otbasy – qoǵamnyń altyn dińgegi, ulttyń rýhani tiregi ekenin atap ótip, qatysýshylarǵa rizashylyǵyn bildirdi.
«Barshańyzdy otbasy qundylyǵyn ulyqtap, shańyraqtyń shyraiyn, urpaq tárbiesiniń ónegesin dáripteitin «Mereili otbasy» ulttyq baiqaýynyń oblystyq kezeńiniń qorytyndysymen shyn júrekten quttyqtaimyn! Jyl saiyn ár aimaqtan ónegeli otbasylar baiqaýǵa belsene qatysyp, qurmetke ie bolyp keledi. Biyl qala, aýdandardan 220 otbasy qatysyp, 16 otbasy úzdik dep tanyldy. Osyndai úlgili áýletter urpaq sabaqtastyǵyn saqtap, qundylyqtardy nasihattaýǵa negiz qalaidy. Halyqtyq Konstitýtsiiamyzda otbasy men urpaq tárbiesiniń qoǵam ómirindegi orny aiqyn kórinis tapqan. Sondyqtan otbasynyń mártebesin kóterý, ata-ananyń bala tárbiesindegi jaýapkershiligin arttyrý, balalardyń quqyqtary men múddelerin qorǵaý – barshamyzǵa ortaq mindet. Shańyraqtyń beriktigin saqtap, syilastyq pen meiirimdilikti ómiriniń ózegine ainaldyrǵan barsha otbasylarǵa shynaiy rizashylyǵymdy bildiremin. Árbir shańyraqqa baiandy baqyt, amandyq pen baq-bereke tileimin!», - dedi Murat Nálqojauly.
«Mereili otbasy» ulttyq konkýrsy oblystyq kezeńiniń jeńimpazy Qutmambetovter otbasy bolyp (Aral aýdany), bas júldeni ielendi.
Shielilik Bákirovter otbasyna I oryn, qazalylyq Doshojaevtar otbasyna II oryn, qyzylordalyq Bimuratovtar otbasyna III oryn berildi.
Jeńimpazdar syilyqtar jáne qarjylai sertifikattarmen marapattaldy. Shara sońy merekelik baǵdarlamaǵa ulasty.
