Búgin oblys ákimi Murat Ergeshbaevtyń qatysýymen sol jaǵalaýdaǵy eki kópqabatty turǵyn úidiń 90 páteri áleýmettik jaǵynan osal toptaǵy otbasylarǵa tabystaldy, dep habarlaidy dalanews.kz.
Saltanatty sharaǵa oblystyq máslihat tóraǵasy Murat Tleýmbetov, ziialy qaýym ókilderi men el aǵalary jáne qala turǵyndary qatysty.
Aimaq basshysy jańa qonys ielerin quttyqtap, izgi tilegin jetkizdi.
«Barshańyzǵa kópten kútken jańa qonys qutty bolsyn! Prezidentimiz Qasym-Jomart Kemeluly: «Qoljetimdi baspana – arman emes, bizdiń azamattarymyzdyń aldyndaǵy mindetimiz», - degen bolatyn. Bul baǵytta Syr óńirinde baiypty bastamalar sátti júzege asýda. Turǵyndardyń ál-aýqatyn arttyrý úshin jaily baspanamen, áleýmettik nysandarmen qamtý júieli jolǵa qoiylǵan. Búgin kezekte turǵan jerlesterimizge aýmaǵy 7 myń sharshy metrden asatyn 90 páterdiń kiltin saltanatty túrde tabystaýdamyz. Aldaǵy ýaqytta da shahardyń ajaryn aishyqtaityn zamanaýi úlgidegi turǵyn úiler boi kóteredi. Jańa qonys qutty, shańyraqtaryńyz biik, bosaǵasy berik bolsyn, ishi bereke men merekege tolsyn! Ár otaýdan búldirshinderdiń kúlkisi estilip, tatýlyq saltanat qura bersin!», - dedi Murat Nálqojauly.
Rásimde el aǵasy Baqbergen Dosmanbetov sóz sóilep, turǵyn úidi salǵan qurylysshylar oblys ákiminiń Alǵys hatymen marapattaldy.
Memleket basshysynyń, Úkimettiń qoldaýymen sońǵy tórt jylda turǵyn úi kezegindegi azamattarǵa 8 myńǵa jýyq páter berilip, 30 myńnan astam jerlesimiz baspanaly boldy.
2026-2027 jyldary 6200-den astam páter tabystalyp, 25 myńǵa jýyq turǵynnyń baspana máselesin sheshý josparlanýda.
Búginde sol jaǵalaýda boi kótergen 169 nysannyń 136-sy - kópqabatty turǵyn úi. Jańa shaǵyn aýdan turǵyndarynyń sany 25 myńnan asty.
Halyqqa jaily orta qalyptastyrý maqsatynda 20 áleýmettik, 13 iri biznes nysany boi túzep, el igiligine qyzmet etýde.
Qazirgi ýaqytta taǵy 48 ǵimarat salynyp jatyr. Sondai-aq I.Toqtybaev kóshesinen sol jaǵalaýǵa ótetin tórt jolaqty jańa kópir qurylysy josparlanǵan.
