Qostanaidyń eks-ákiminen tárkilengen meiramhana 100 mln teńgege arzandatsa da ótpei qaldy,- dep habarlaidy Dalanews.kz Ulysmedia.kz-ke siltep.
Basylym málimetinshe, 307 mln teńgege shyǵarylǵan meiramhanany satyp alýǵa eshkim niet bildirmegen.
"8 jyldyń ishinde birneshe ret aýktsionǵa shyǵarylǵan meiramhana áý basta 420 mln teńgege (bastapqy quny) satylǵan edi. Jyldar óte kele nysan ábden tozyp, bastapqy quny 307 mln teńgege deiin túsken. Soǵan qaramastan, 13 qarashada saǵat 10.00-de ótkizilgen aýktsion kezinde ony satyp alýǵa eshkim ótinim qaldyrmady", - dep jazylǵan málimette.
Qazir nysan Qostanai oblysy ákimdigi kásipkerlik basqarmasynyń balansynda. Elektrondy saýda alańynyń aqparatyna sáikes, meiramhananyń bastapqy baǵasy 307,3 mln teńge, baǵalaý quny 614, 7 mln teńge dep kórsetilgen. Byltyr bul nysannyń bastapqy baǵasy 800 mln teńge bolyp kórsetilgen edi.
Nysan 2014 jyly boi kótergen. Jalpy aýmaǵy 1558 sharshy metr. Ózi Ekaterinbýrg – Almaty tas jolynyń boiynda ornalasqan.
Buryn meiramhana ǵimaratyn aýktsion arqyly ákimdik birneshe ret satýǵa tyrysqan, biraq ony alýǵa eshkim qyzyǵa qoiǵan joq.
"Bul – burynǵy sheneýnikten tárkilenip, qoǵamdyq saýdaǵa shyǵarylǵan alǵashqy nysan emes. Buǵan deiin tárkilengen "Metropol" meiramhanasy memleket menshigine berilgen bolatyn. Qazir bul ǵimaratta "Azamattarǵa arnalǵan úkimet" ornalasqan. Ahmetjanovtyń taǵy bir menshigi – 87,5 mln teńgege baǵalanǵan "Monolit" saýda úii 40,5 mln teńgege satylyp ketken.
Ahmetjanov 2015 jyly eki orynbasary jáne birneshe kásipkermen birge ustalǵan edi. Sol tusta atyshýly is "Úlken ákimdik isi" degen atpen tarihta qaldy. Qostanaidyń burynǵy ákimi para aldy degen kúdikke ilinip, 2016 jyly sottalǵan", - dep jazylǵan basylym dereginde.
2016 jyldyń sáýir aiynda Qostanaidyń burynǵy ákimi Ahmetbek Ahmetjanov múlki tárkilenip, memlekettik qyzmette qyzmet atqarý quqyǵynan ómir boiyna aiyrylyp, 13 jylǵa bas bostandyǵynan aiyrylǵan edi. Biraq apelliatsiiadan keiin oǵan shyqqan úkim 7 jyl 6 aiǵa deiin qysqardy.
Qazaqstan Táýelsizdiginiń 25 jyldyǵyna bailanysty Ahmetjanov raqymshylyqqa ilinip, berilgen jaza 4 jyl 10 ai 23 kúnge deiin tómendedi. 2019 jyly ol shartty túrde merziminen buryn bosap, jazanyń ótelmegen bóligin aiyppul tólep japty. Sol jyldyń 1 sáýirinde Qostanai oblystyq soty ony shartty túrde merziminen buryn bosatý týraly sheshim qabyldady.
