Amerikalyq Forbes basylymy dástúrli Forbes World’s Billionaires jahandyq milliarderler reitingin jariialady, dep habarlaidy Dalanews.kz.
2025 jyly Forbes nusqasy boiynsha álemniń eń bai adamdarynyń qataryna jeti qazaqstandyq kásipker endi: Viacheslav Kim, Mihail Lomtadze, Timýr Týrlov, Vladimir Kim, Timýr jáne Dinara Qulybaevtar, sondai-aq Bolat Ótemuratov.
Qazaqstandaǵy eń bai biznesmen ataǵy 2025 jyly Viacheslav Kimge tiesili boldy. Kaspi.kz aktsioneri jáne direktorlar keńesiniń tóraǵasynyń bailyǵyn Forbes 7,1 mlrd dollarǵa baǵalady (byltyr 5,8 mlrd dollar bolǵan). Ol 2024 jyly 511-orynnan biyl 464-orynǵa kóterildi.
Onyń seriktesi, Grýziia azamaty Mihail Lomtadze Qazaqstan milliarderleri arasynda ekinshi orynda tur jáne Forbes-tyń álemdik reitinginde 597-orynǵa jaiǵasty. Onyń bailyǵy biyl 5,9 mlrd dollar dep baǵalandy (2024 jyly – 5,2 mlrd dollar, 581-oryn).
Freedom Holding negizin qalaýshy Timýr Týrlov ótken jyly qazaqstandyq milliarderler arasynda besinshi orynda bolsa, biyl úshinshi orynǵa kóterildi. Onyń bailyǵy bir jyl ishinde 3,3 mlrd dollardan 5,8 mlrd dollarǵa deiin artty. Forbes reitinginde 991-orynnan 605-orynǵa kóterildi.
Tórtinshi orynda – KAZ Minerals jáne Qazaqmys aktsioneri Vladimir Kim. Onyń bailyǵy 5,7 mlrd dollar dep baǵalanyp otyr (byltyr – 3,6 mlrd dollar). Forbes reitinginde ol 896-orynnan 620-orynǵa kóterildi.
Besinshi jáne altynshy oryndarǵa «Almeks» holdingtik tobynyń jetekshisi jáne teń iesi Timýr Qulybaev pen onyń jubaiy Dinara Qulybaeva jaiǵasty. 2025 jyly jahandyq reitingte olar 673-oryndy ielense (byltyr – 612-oryn), árqaisysynyń bailyǵy 5,3 mlrd dollar dep baǵalandy (2024 jyly – 5 mlrd dollar).
ForteBank aktsioneri Bolat Ótemuratov qazaqstandyq milliarderler arasynda jetinshi orynǵa turaqtady. Onyń bailyǵy 2,7 mlrd dollardan 3,7 mlrd dollarǵa deiin ósti. Forbes reitinginde ol 1238-orynnan 979-orynǵa kóterildi.
Qazaqstandyq milliarderlerdiń jalpy bailyǵy 2025 jyly 38,8 mlrd dollar dep baǵalandy (2024 jyly – 25,4 mlrd dollar).
Álemdegi eń bai adamdar kimder?
Forbes reitinginiń kóshin Tesla jáne SpaceX iesi Ilon Mask bastady. Onyń bailyǵy 342 mlrd dollardy qurap, bir jylda 147 mlrd dollarǵa artty.
Byltyr kósh bastaǵan, Louis Vuitton Moët Hennessy tobynyń prezidenti jáne bas direktory Bernar Arno biyl besinshi orynǵa tústi. Onyń bailyǵy bir jylda 55 mlrd dollarǵa azaiyp, 178 mlrd dollardy qurady.
Meta (burynǵy Facebook) negizin qalaýshy Mark Tsýkerberg tórtinshi orynnan ekinshi orynǵakóterilip, onyń bailyǵy 216 mlrd dollar dep baǵalandy (2024 jyly – 177 mlrd dollar).
Úshinshi orynda Amazon basshysy Djeff Bezos, onyń bailyǵy 215 mlrd dollardy qurady.
Forbes World’s Billionaires reitingi boiynsha álemniń eń bai 20 adamynyń jalpy bailyǵy 2,8 trln dollardy quraidy.
