2026 jyly Qazaqmys Jezqazǵan mys balqytý zaýytynyń óndiristik infraqurylymyn aýqymdy jańǵyrtý jumysyn bastady. Kásiporynnyń nysandaryn kúrdeli jóndeýge jáne qalpyna keltirý jumysyna 4,4 mlrd teńge qarastyrylǵan, dep habarlaidy Dalanews.kz.
Baǵdarlamanyń eń iri jobalarynyń biri — quny 2,03 mlrd teńgeden asatyn mys elektrolizi tsehynyń shatyryn kúrdeli jóndeý. Jumys 2026 jylǵy maýsymda bastaldy.
Joba aiasynda tozyǵy jetken temirbeton plitalar óndiristik orta men korroziia áserine tózimdi zamanaýi sendvich-panelderge aýystyrylýda. Sonymen qatar sý qubyry jelisiniń jekelegen ýchaskeleri jáne olarǵa ilespe injenerlik infraqurylym jańartylýda.
Joba tórt kezeńde júzege asyrylady jáne jalpy aýdany 8 600 sharshy metr shatyrdy jańartýdy kózdeidi. Qazirgi ýaqytta shamamen 3 000 sharshy metr aýmaq keiingi montajdaý jumysyna daiyndaldy. Birinshi kezeńdi 2027 jyldyń ortasyna deiin aiaqtaý josparlanǵan.
Biiktikte jumys isteý jáne montajdaý jumysyn oryndaý kezinde ónerkásiptik qaýipsizdikke erekshe kóńil bólinedi. Jumyskerler qajetti jeke qorǵanys quraldarymen qamtamasyz etilgen, al qaýipsizdik talabynyń saqtalýy jumystyń barlyq kezeńinde baqylaýda bolady.
Mys elektrolizi tsehynan bólek, JMZ-da №1 salqyndatqysh munaraǵa kúrdeli jóndeý júrgizilip, konverter bólimshesiniń shatyry qalpyna keltirilýde. Balqytý tsehynyń ákimshilik-turmystyq keshenindegi jýynatyn bólmelerge júrgizilip jatqan kúrdeli jóndeý jumysy aiaqtalýǵa jaqyn.
Óndiristik infraqurylymdy jańartý Qazaqmystyń jańa basqarý komandasynyń 2026 jylǵy basym baǵyttarynyń birine ainaldy. Baǵdarlamany iske asyrý óndiristik nysandardyń senimdiligin arttyrýǵa, infraqurylymdyq táýekelderdi azaitýǵa jáne jumysshylardyń eńbek jaǵdaiyn jaqsartýǵa baǵyttalǵan.
