Qazaqstan biligi Reseide jumys izdep barǵan jáne Ýkrainadaǵy soǵysqa jiberilý qaýpine tap bolǵan qazaqstandyqtar máselesin diplomatiialyq jabyq arnalar arqyly sheship jatyr, dep habarlaidy dalanews.kz.
Quryltai depýtaty Erlan Sairov Reseide jumys izdep barǵan qazaqstandyqtardyń Resei armiiasy quramynda Ýkrainadaǵy soǵysqa jiberilýi múmkin ekeni týraly aqparatqa qatysty pikir bildirdi.
Jýrnalister depýtattan qazirgi jaǵdai týraly surady. Olardyń aitýynsha, Astanaǵa Reseide júrgen qazaqstandyqtardyń ata-analary kelgen. Áńgime shamamen 21 adam týraly bolyp otyr. Olardyń keibiri Reseiden jumysty internettegi habarlandyrýlar, sonyń ishinde OLX arqyly tapqan.
Erlan Sairovtyń aitýynsha, bul másele buǵan deiin de kóterilgen. Qazir Qazaqstan Úkimeti jaǵdaidy diplomatiialyq arnalar arqyly sheshýge jumys istep jatyr.
«Bul másele buǵan deiin de kóterildi. Qazir Úkimetimiz bul máselemen jabyq diplomatiialyq arnalar arqyly jumys istep jatyr. Jaǵdai óte qaýipti bolǵandyqtan, qazirgi ýaqytta kópshilikke egjei-tegjeili aqparat bere almaimyz. Biraq Úkimet bul máselemen diplomatiialyq arnalar arqyly ainalysyp jatqanyn aita alamyn»,- dedi depýtat.
Sairov qazirgi kúrdeli geosaiasi jaǵdaiǵa bailanysty azamattardyń shetelge shyǵý kezinde yqtimal táýekelderdi aldyn ala baǵalaýy qajet ekenin atap ótti.
«Halyqaralyq jaǵdai kún saiyn ózgerip jatyr, qaýip pen qater óte kóp. Ár azamat qandai da bir qadamǵa barmas buryn óte saq bolýy kerek. Eger azamattar basqa elderge barýdy josparlasa, zań men tártipti saqtap, óz qaýipsizdigine muqiiat qaraýy qajet», - dedi ol.
Jýrnalister Reseide azamattarǵa jumys taýyp berýge ýáde etetin deldaldar máselesin de kóterdi. Sairov bilik qoǵamda talqylanyp jatqan máselelerdiń barlyǵymen jumys istep jatqanyn aitty.
Buǵan deiin Qazaqstan Syrtqy ister ministrligi Reseide jumys isteýge barǵan qazaqstandyqtardyń soǵysqa tartylýy múmkin ekeni týraly aqparatqa bailanysty tiisti jumystar júrgizilip jatqanyn málimdegen. Vedomstvo máseleni Resei tarapymen diplomatiialyq arnalar arqyly talqylap jatyr.
