Memleket basshysy Halyqaralyq shahmat federatsiiasynyń (FIDE) prezidenti Timýr Týrlovty qabyldady, dep habarlaidy dalanews.kz.
Qasym-Jomart Toqaev Timýr Týrlovty Halyqaralyq shahmat federatsiiasynyń prezidenti bolyp sailanýymen quttyqtady. Prezidenttiń aitýynsha, bul Qazaqstan men otandyq shahmat mektebiniń álemdik arenadaǵy abyroiy artyp kele jatqanyn kórsetedi.
Memleket basshysy elimiz úshin shahmattyń orny erekshe ekenine toqtaldy. Shahmat sporttyń bir túri bolýymen qatar óskeleń urpaqtyń ziiatkerlik áleýetin damytýdyń mańyzdy tetigi sanalady. Sońǵy jyldary qazaqstandyq shahmat mektebi qarqyndy damyp kele jatyr. Elimizde sporttyń osy túrimen 278 myńnan astam adam júieli túrde ainalysady.
Qasym-Jomart Toqaev Samarqandta ótken Dúniejúzilik shahmat olimpiadasynda kúmis medal ielengen áielder quramasynyń jarqyn jetistigin airyqsha atap ótti. Budan bólek, Prezident Qazaqstan shahmat federatsiiasynyń aldynda turǵan basym mindetterdi atady.
Memleket basshysy qurama komandanyń ázirligin kúsheitý, jas talanttardy anyqtaý men daiarlaýdyń tiimdi júiesin qurý, bilim berý salasynda shahmatty ilgeriletý jáne óńirlerde shahmat infraqurylymyn damytý qajettigine nazar aýdardy.
Qasym-Jomart Toqaev otandyq bapkerler men tóreshilerdiń biliktiligin arttyrý, birlesken bilim berý jobalaryn iske asyrý, sondai-aq Qazaqstanda shahmattan iri halyqaralyq jarystar ótkizý úshin ulttyq federatsiia men FIDE arasyndaǵy yntymaqtastyqty nyǵaitýdyń mańyzyna basa mán berdi. Kezdesý sońynda Qasym-Jomart Toqaev Timýr Týrlovtyń jaýapty qyzmetine tabys tiledi.
FIDE basshysy shahmatty damytýǵa den qoiyp, oǵan qoldaý kórsetkeni úshin Qazaqstan Prezidentine rizashylyǵyn bildirdi. Sonymen qatar shahmatty álemde keńinen nasihattaý, halyqaralyq yntymaqtastyqty nyǵaitý jáne ulttyq shahmat federatsiialarynyń qatysýymen jańa jobalardy iske asyrý jóninde málimet berdi.
