«Esenkeldi» sharýa qojalyǵyn basqaryp otyrǵan azamat jylyjaida kókónis ósirýmen 27 jyldan beri shuǵyldanyp keledi.
5 jyl buryn Qytaidan Kókshetaýǵa, budan keiin 2018 jyly otbasymen Pavlodar oblysynyń Mai aýdanyna qonys aýdarǵan.
Kásippen ainalysýdy jón kórgen ol óziniń sharýa qojalyǵyn quryp, 1000 sharshy metrge jýyq eki jylyjaiynda qiiar men qyzanaq ósirýdi qolǵa alǵan.
- Mamandyǵym – agronom, - deidi Nurbolat Rymbekuly. – Qolymnan keletin ispen shuǵyldanamyn. Qiiar, qyzanaqpen qosa, azdap burysh egemin. Ónimderime eshqandai himiialyq dári-dármek qosylmaidy. Aýyldyń taza ónimi. Jergilikti halyqtan suranys kóp. Jerdi jalǵa alyp, jumysqa kiristim. Ákimdik elektr jelisin tartyp berdi. Kásipkerler palatasy barlyq qujattaryma kómektesýde. Bilik barynsha qoldaý kórsetip jatyr.
Sharýa qojalyǵy 7 adamdy jumyspen qamtyp otyr. Óniminiń baǵasy da halyqqa qoljetimdi. Qiiardyń kelisin 200 teńgemen saýdalaýda. Qyzanaq endi pisetindikten áli satylymǵa shyqpaǵan. Satylymǵa shyqqanda bazardaǵydan tómen baǵa qoimaq. Qazirgi ýaqytta kúnine 60-70 keli qiiar alady. Ónimdi satyp alýshylar aýdan men aýyldardan kelip alyp ketedi.
Jylyjaimen qosa, 5 gektar jerge burysh, qyryqqabat, qaýyn siiaqty túrli kókenister ekken. Qyzanaqtyń sortyn agronom ózi qalyptastyrǵan. Eki túrli tuqymnan býdandastyryp jańa ónim alyp otyr.
- Gollandiialyq kúlgin qyzanaq pen kishkentai sopaq qyzanaqty býdandastyrdym, - deidi Nurbolat Rymbekuly. – Jańa túr soltústik óńirge qolaily. Bul jaqta jel qatty soǵatyndyqtan alasa ósetin qyzanaq yńǵaily. Meniń býdandastyryp alǵan qyzanaǵym jerde jatyp ósedi. Sýyqqa tózimdi. Pishini sopaq jáne domalaq bolyp keledi. Bul bir ret qana býdandastyryp alǵanym. Eki-úsh retten keiin qalypqa kelýi tiis.
Qojalyq iesiniń jubaiy «Bastaý biznes» jobasymen oqyp, memlekettik grantqa ie bolǵan. Grant qarjysyna inkýbator satyp alǵan.
- Inkýbatormen 20 kúnde 80-90 qazdyń balapany shyǵarylady, - deidi Nurbolat Rymbekuly. – Ony jergilikti turǵyndar ózderi alyp ketedi. Búginde ulym da kásipkerlik kýrsynan ótip, grantqa qujattaryn daiyndaýda. 21 jastaǵy ulyma sharýashylyqtyń qyr-syryn úiretip júrmin. Budan bylai sharýany ol júrgizedi. Nurbolat Rymbekuly tabysy mol iri jobany qurastyrǵan. Joba jyl boiy ónim beretin 5-10 gektarlyq jylyjaiǵa arnalǵan. - Iri jylyjaimen 70-80 otbasyn jumyspen qamtýǵa múmkindik bar, - deidi qojalyq iesi. – Oǵan ońtústik óńirden jumys kúshin tartýǵa da bolady. Jobanyń quny 100 million teńgeni quraidy. Qazirgi kezde soǵan nesie alýdyń jolyn qarastyrýdamyz.
Aita keteiik, Mai aýdanyna arnaiy is saparmen kelgen QR Parlamenti Májilisiniń depýtattary Aizada Qurmanova men Merýert Qazybekova sharýa qojalyǵynyń jumysyna joǵary baǵa berip, aýdan basshylyǵyna ári qarai qoldaý kórsetýdi tapsyrdy.
Derekkóz: pavlodarnews.kz
