Respýblikalyq mańyzy bar «Oral–Atyraý» tasjolynyń jalpy uzyndyǵy 500 shaqyrymǵa jýyqtasa, BQO-daǵy bóligi 303 shaqyrymdy quraidy. Biyl óńir aýmaǵynda atalǵan kúre joldy ortasha jóndeý boiynsha 3 joba júzege asyrylýda. Oblys ákiminiń orynbasary Miras Múlkái bastaǵan quzyrly qurylym basshylary jáne «QazAvtoJol» UK» AQ BQOF direktory Asylbek Mardanov merdigerlermen kezdesip, atqarylyp jatqan jumystarǵa zer saldy, dep habarlaidy dalanews.kz.
«Atyraý–Oral» avtojolynyń 189–249 shaqyrym ýchaskesin ortasha jóndeý jumystaryn «Aidana» JShS júrgizýde. Joba quny 8,5 mlrd teńgege jýyqtaidy. Munda 20 shaqyrym jol resaikling ádisimen retke keltiriledi. Keiin 60 shaqyrym joldyń tómengi qabatyna iri túiirshikti, al joǵarǵy qabatyna usaq túiirshikti asfaltbeton tóseledi. Ýchaskede 4 aialdama pavilony ornatylady.
«Atyraý–Oral» avtojolynyń 372–432 shaqyrym jáne 432–492 shaqyrym ýchaskelerin ortasha jóndeý boiynsha qos jobany «DSK Prioritet» JShS júzege asyrýda. Munda eski joldyń 29 shaqyrym bóligi resaikling ádisimen qaita óńdeledi. 120 shaqyrym jol qabattaryna iri jáne usaq túiirshikti asfaltbeton tóseledi. 18 aialdama pavilony ornatylady.
Biyl respýblikalyq mańyzy bar «Chapaev–Jalpaqtal–Kaztalovka–RF shekarasy» avtojolynyń 0–17 shaqyrym ýchaskesi de jóndelip jatyr. 2,7 mlrd teńgeniń jobasyn «TOBI» JShS júzege asyrady. 16,5 shaqyrym jolǵa resaikling jasalady. Ýchaskege iri túiirshikti jáne beriktigi joǵary arnaiy asfaltbeton tóselip, 1 avtomatty ólsheý júiesi ornatylady.
«TOBI» kompaniiasy «Aqtóbe–Oral–RF shekarasy» avtojolynyń 369–408 shaqyrym ýchaskesin de jóndep jatyr. Munda 26 shaqyrym jol resaikling ádisimen qaita óńdeledi. 39 shaqyrymǵa beriktigi joǵary asfaltbeton tóselip, Shiderti men Óleńti ózenderindegi kópirlerdiń deformatsiialyq jikteri aýystyrylady. Ýchaskede 4 aialdama pavilony ornatylady.
Atalǵan 5 jobanyń nátijesinde jalpy uzyndyǵy 236 shaqyrym kúre joldar ortasha jóndeýden ótedi. Barlyq nysanda jol qaýipsizdigin qamtamasyz etý, belgilerdi jańartý, zamanaýi aialdamalar ornatý jáne jol jiekterin nyǵaitý siiaqty keshendi is-sharalar qarastyrylǵan. Oblys ákiminiń orynbasary Miras Múlkái merdigerlerge jumystardy sapaly ári ýaqytyly aiaqtaýdy tapsyrdy.
