Leonardo da Vinchidiń eń jumbaq jáne qundy jaýharlarynyń biri La Bella Principessa Qazaqstan jurtshylyǵyna usynylady, dep habarlaidy Dalanews.kz.
Sýret Sfortsiada Varshavalyq kodeksinen alynǵan jáne Milan gertsogy Liýdoviko il Moronyń qyzy ári general-kapitan Galeatstso Sanseverinonyń jubaiy Bianka Djovanna Sfortsanyń qyrynan kórinisi dep tanylǵan. La Bella Principessa – sheberdiń pergamenttegi jalǵyz týyndysy bolyp tabylady. Bul biregei múmkindik Astanadaǵy Italiia elshiliginiń, ForteBank, Mastercard, Scripta Maneant jáne Italiia mádeniet institýtynyń, sondai-aq Qazaqstan Respýblikasy Mádeniet jáne aqparat ministrliginiń qoldaýymen júzege asty. Kórme Astanadaǵy Qazaqstan Respýblikasynyń Ulttyq mýzeiinde 7 maýsym men 4 tamyz aralyǵynda ótedi.
La Bella Principessa — Leonardo da Vinchidiń XV ǵasyrdyń aiaǵynda salǵan týyndysy, onda italiandyq aqsúiekter otbasynan shyqqan jas qyzdyń portreti beinelengen. Joǵalyp, keiin qaitadan tabylǵan shyǵarma sheberdiń eń jumbaq jáne tań qaldyratyn týyndylarynyń biri bolyp tabylady. Buǵan deiin kartina búkil álem boiynsha bes ret qana kórsetilip, ár ýaqytta synshylar men kórermenderdiń úlken qyzyǵýshylyǵyn týdyrdy.
"Leonardo - Renessans adamynyń beinesi, daryn, danyshpandyq jáne shyǵarmashylyqtyń máńgilik ózekti nyshany. Sýretshi jaýharlarynyń biri Astanada kórmelenýi - elderimiz arasyndaǵy yntymaqtastyqty nyǵaitýdyń biregei múmkindigi", - dedi Italiianyń Qazaqstan Respýblikasyndaǵy elshisi Marko Alberti.
Ǵalymdar, mýzeiler jáne tehnologiialyq zertteý institýttarymen uzaq jyldar boiy yntymaqtasyp qyzmet etetin Scripta Maneant baspasy Qazaqstandaǵy Italiia elshiligimen, Italiia mádeniet institýtymen, Forte Bank jáne Mastercard-pen birlesip, Leonardonyń bul týyndysyn Astana tórinde kórmege usynǵanyn maqtan tutady, ári kelýshilerdiń Renessans dáýiriniń óresi biik ónerin tamashalap, rýhani lázzat alýyna múmkindik beredi.
"Álemdegi basty mádeni is-sharalardy qoldaý Mastercard jumysynyń mańyzdy baǵyty bolyp tabylady, osylaisha kompaniia baǵa jetpes sátter jáne áigili tulǵalarmen kezdesý múmkindigin syilaidy, sonyń ishinde tanymal ártister, mýzykanttar jáne sýretshilerdiń shyǵarmashylyǵymen tanysýdy da atap ótken jón. Biz bul jobany qýana qoldadyq jáne qazaqstandyqtar Leonardo da Vinchidiń týyndysymen tanysýdan shynaiy rahat pen baǵa jetpes áser alatynyna senimdimiz", - dep atap ótti Mastercard kompaniiasynyń Qazaqstan men Ortalyq Aziiadaǵy bas direktory Sanjar Jamalov.
"ForteBank" AQ mádeniet pen ónerdi júieli negizde qoldaidy. Atap aitqanda, bank sońǵy segiz jyl ishinde mádeni murany damytý, qoldaý jáne óskeleń urpaqty tárbieleý maqsatynda "Qulan-Astana" QB qyzmetin qarjylandyryp keledi: osy ýaqyt ishinde 35-ten astam kórme uiymdastyryldy, onyń ishinde halyqaralyq mańyzy zor jobalar bar. Galereiaǵa kirý tegin.
"Bizdiń elimizde osyndai sirek kezdesetin jaýhardy kórý múmkindigi - Qazaqstannyń mádeni ómiri úshin mańyzdy oqiǵa. Biz oǵan qatysqanymyzǵa qýanyshtymyz. Qalyń kórermen Leonardo da Vinchidiń óshpes týyndysyn kórgen boida eleń etip, beijai qalmaitynyna senimdimin", - dedi "ForteBank" AQ Basqarýshy direktory Áliia Esjan.
Uiymdastyrýshylar elordanyń barlyq qonaqtary men turǵyndaryn Leonardo da Vinchidiń áigili shyǵarmasynyń ásemdigin tamashalaý úshin Qazaqstan Respýblikasynyń Ulttyq mýzeiine kelýge shaqyrady.
