Oljas Bektenov «Belagro-2024» halyqaralyq kórmesine qatysyp, «Eýraziialyq ekonomikalyq odaqtyń azyq-túlik qaýipsizdigi» plenarlyq sessiiasynda sóz sóiledi. Sessiiaǵa Resei, Qyrǵyzstan, Ózbekstan, Belarýs, Ázerbaijan úkimetteriniń basshylary, Armeniia vitse-premeri, sondai-aq Eýraziialyq ekonomikalyq komissiia alqasynyń tóraǵasy qatysty, - dep habarlaidy Dalanews.kz.
QR Premer-Ministri atap ótkendei, halyqty sapaly ári qaýipsiz azyq-túlikpen qamtamasyz etý basty mindet bolyp qala bermek. Qazaqstan Ortalyq Aziiadaǵy astyq pen unnyń negizgi óndirýshisi bola otyryp, óziniń aýyl sharýashylyǵy salasyndaǵy áleýetin jahandyq azyq-túlik turaqtylyǵyn qamtamasyz etý úshin paidalanady. QR álemdik azyq-túlik eksporttaýshylarynyń TOP-25 qataryna kiredi. Otandyq aýyl sharýashylyǵy ónimderi álemniń 80 eline, sonyń ishinde Ortalyq Aziia men EAEO elderine jetkiziledi. Onyń eksporty sońǵy 5 jylda eki esege ósip, $5,4 mlrd-qa jetti.
«Elimizdi damytýdyń strategiialyq basymdyqtarynyń biri – agroónerkásip kesheni. Memleket basshysy Qasym-Jomart Toqaev Qazaqstan Úkimetiniń aldyna ishki qajettilikti tolyq qamtamasyz etip, eksport kólemin odan ári arttyra otyryp aýyl sharýashylyǵy salasyn tereń óńdeý deńgeiine jetkizý mindetin qoidy. Elimiz 2026 jylǵa qarai aýyl sharýashylyǵy ónimderiniń eksportyn eki esege ulǵaitýdy maqsat etip otyr. Bul rette bizdegi eksporttyń qurylymy belsendi túrde ózgertilip, tereń óńdeý ónimderine basymdyq beriledi. Biz Qazaqstanda lokalizatsiialaýmen birlesken qaita óńdeý óndiristerin ashýǵa múddelimiz», — dep atap ótti Oljas Bektenov.
Qazaqstan Premer-Ministri EAEO-ǵa qatysýshy elderdiń 600 mln-ǵa jýyq adamnyń azyq-túlikke degen qajettiligin qamtamasyz etý jónindegi áleýetine nazar aýdardy. Ol úshin Odaqqa qatysýshy barlyq memlekettiń qajettilikteri men múddelerin eskere otyryp, ulttyq deńgeilerde azyq-túlik jetkizý tásilderin úilestirý qajet.
«Ozyq halyqaralyq standarttarǵa sáikes keletin básekege qabiletti, ekologiialyq jáne eksportqa baǵdarlanǵan ónim shyǵarý úshin tyǵyz kooperatsiialyq bailanys ornatý bizdiń negizgi mindetterimizdiń biri bolýǵa tiis. Ortalyq Aziia arqyly jańa logistikalyq baǵyttardy odan ári damytý jáne Qytaiǵa jetkizetin qoldanystaǵy baǵyttardyń ótkizý qabiletin arttyrý perspektivalardy keńeite túspek», — dep atap ótti Úkimet basshysy.
Oljas Bektenov logistika men saqtaý jaǵdailaryna bailanysty aýyl sharýashylyǵy ónimin joǵaltý máselesin sheshý, sondai-aq jahandyq jylyný, sý tasqyny men qurǵaqshylyq sekildi maýsymdyq syn-tegeýrinderdi saraptamalyq baǵalaý jumystaryn eskere otyryp, agroazyq-túlik júieleriniń turaqtylyǵyn nyǵaitý úshin qajetti sharalarǵa toqtaldy. Sonymen qatar qazirgi zamanǵy agrarlyq ǵylymdy damytý jáne AÓK-te innovatsiialardy belsendi túrde engizý máselesi erekshe atap ótildi.
Sondai-aq «Belagro-2024» kórmesinde Qazaqstan Respýblikasynyń ulttyq ekspozitsiiasy da qaraldy. Onda kombaindar, traktorlar, jańbyrlatyp sýarý apparattary sekildi otandyq aýyl sharýashylyǵy tehnikalary men AÓK tereń óńdeý ónimderi usynylǵan. Buǵan qosa qazaqstandyq agrarlyq ǵylymi-zertteý institýttarynyń ǵylymi jetistikteri, máselen, egistikterdi óńdeý úshin qoldanylatyn dron, selektsiialyq jetistikterdiń patentteri, onyń ishinde almanyń 4 surpy kórsetildi.
