Nurlan Noǵaev: aýyl sharýashylyǵy óńirde sý máselesi sheshilgennen keiin óz jemisin beredi
Jurtshylyqpen kezdesýde óńir basshysy Nurlan Noǵaev óńir halqyn kommýnaldyq qyzmetter sapasy tolǵandyratynyn aitty.
- Búgingi tańda Aqtaýdyń injenerlik jelileri orta eseppen 80% - ǵa tozǵan. Prezident Úkimetke oblys ortalyǵyndaǵy injenerlik jelilerdi qaita jańartýǵa qajetti qarajat bólýdi tapsyrdy. Óńirdegi sý tapshylyǵy máselesin sheshý joly- «MAEK» - ti jergilikti ákimdikke, kommýnaldyq menshikke berý boldy. Qoǵamda bul sheshim eki túrli kózqaras qalyptastyrǵanyn aityp ótken jón. Alaida kásiporyndy kommýnaldyq menshikke berýdiń nátijesinde biz kásiporyndy jańǵyrtý baǵdarlamasyn ázirleý múmkindigine qol jetkizdik. Baǵdarlama sheńberinde jobalardy jańǵyrtý úshin 128 mlrd. teńge kóleminde qarjy qajet bolady. Halyqty sapaly kommýnaldyq qyzmettermen qamtamasyz etý maqsatynda 2026 jylǵa deiin Aqtaý qalasynyń 25 shaǵyn aýdanyn 5 aimaqqa bóle otyryp, 919 shaqyrym injenerlik jelilerdi (sý, káriz, jylytý) jańǵyrtýdy júrgizý josparlanýda, - dedi oblys ákimi.
Sý tapshylyǵy týraly aita kele, óńir basshysy sý resýrstarynyń jetispeýshiligi aýyl sharýashylyǵynyń damýyna keri áserin tigizetinin atap ótti.
- Oblystaǵy sý máselesi ásirese sońǵy jyldary qatty sezilýde. Oblys aýmaǵynda aýa-raiy shekten tys ystyq bolǵany ras. Al sý tapshylyǵy aýyl sharýashylyǵynyń ósimine keri áser etedi. Azyq-túlik baǵasynyń ósýi jergilikti halyqtyń áleýmettik-ekonomikalyq jaǵdaiyna ǵana emes, sonymen qatar aimaqtaǵy azyq-túlik baǵasynyń qaýipsizdigine de áser etti. Osyǵan bailanysty biz jaǵdaidy turaqtandyrý úshin júieli sharalar qabyldap jatyrmyz, - dedi Nurlan Noǵaev.
Bul máseleni sheshý úshin Mańǵystaý oblysynyń ákimdigi jeti sý tushytý zaýytyn salýdy josparlap otyr. Osy maqsatta oblystyń 2021-2025 jyldarǵa arnalǵan áleýmettik-ekonomikalyq damýynyń bekitilgen keshendi jospary sheńberinde barlyq qarjylandyrý kózderinen 236,8 mlrd teńge qajet bolady.
Nurlan Noǵaev Mańǵystaý aýmaǵyndaǵy kúrdeli klimattyq jaǵdailarǵa qaramastan aýyl sharýashylyǵyn áli de damytýǵa bolatynyn aitty. Biyl Mańǵystaýda aýyl sharýashylyǵyn damytýǵa 1,9 mlrd teńge bólindi. Mal sharýashylyǵy salasyn sýbsidiialaý mólsheri 2021 jyly 127 mln teńgeden 2023 jyly 818 mln teńgege deiin ulǵaidy.
- Sondai-aq, óńirde aýyl sharýashylyǵyn damytý maqsatynda biz aýyl azamattaryna «Aýyl amanaty» atty nesie berý jobasyn iske asyramyz. Joba sheńberinde jylyna 2,5% -ben 5-7 jyl merzimge shaǵyn nesieler beriledi. Jalpy somasy 1,2 mlrd teńgege 250 jobany iske asyrý josparlanýda. Joba aýyl turǵyndarynyń ál-aýqatyn jaqsartýǵa jáne problemalaryn jedel sheshýge múmkindik beredi dep oilaimyn. Sonymen qatar, memleket usynatyn sýbsidiialar, sondai - aq jeńildetilgen nesie óńirdegi kásipkerlikti damytýǵa jáne jumyssyzdyq deńgeiin tómendetýge yqpal etýi tiis, - dedi jiyn barysynda óńir basshysy.
