Almatyda «Jas Qanat. Balalar-2024» atty ekinshi respýblikalyq balalar shyǵarmashylyǵy baiqaýy ótti. Biyl konkýrsqa Qazaqstannyń túkpir-túkpirinen daryndy balalardan 130 ótinim kelip tústi. Solardyń ishinen 17 úmitker finalǵa ótti, dep habarlaidy Dalanews.kz.
Biylǵy baiqaýǵa qatysýshylar deńgeii óte joǵary bolǵandyqtan, kásibi qazylar alqasy jeńimpazdy anyqtaý barysynda biraz qinaldy. «Jas Qanat. Balalar-2024» baiqaýynyń qazylar quramynda elimizdiń ataqty óner juldyzdary: Qazaqstan Respýbli-kasynyń eńbek sińirgen qairatkerleri Nurlan Abdýllin, Aigúl Babaeva jáne Jámilá Serkebaeva, kompozitor Artyq Toqsanbai, ánshi, prodiýser, «Jas Qanat» baiqaýynyń 2000 jylǵy laýreaty Nurgúl Nuǵymanova, estrada juldyzy Parviz Nazarov jáne Qazaqstan Respýblikasynyń eńbek sińirgen ártisi, Qazaqstan kompozitorlar odaǵynyń múshesi Medeý Arynbaev boldy.
Baiqaý nátijesi boiynsha úshinshi orynǵa Qaraǵandy qalasynan kelgen 13 jastaǵy Ansar Abdýrahman ie boldy. Al ekinshi oryndy 13 jasar almatylyq Sofiia Balǵazina jeńip aldy. Birinshi oryn Taldyqorǵan qalasynan kelgen 12 jastaǵy Injý Esimjanǵa buiyrdy. Ony mamandar qazirdiń ózinde bolashaq Bibigúl Tólegenova dep atap júr. Al «Jas Qanat. Balalar-2024» baiqaýynyń Bas júldesin Almaty qalasynyń turǵyny, 13 jastaǵy Azat Súndetbek jeńip aldy.
Sonymen qatar, baiqaý aiasynda birneshe arnaiy nominatsiialardyń jeńimpazdary men diplomanttary anyqtaldy. «Úmit» arnaiy júldesi almatylyq Qýanysh Baimuhambetovke tabystaldy. Ulttyq dástúrlerdi saqtaǵany úshin «Aziia Daýysy» qorynyń arnaiy syilyǵyn Almaty turǵyny Hanshaiym Pyshan ielendi. Daryndy shyǵarmashylyǵy men avtorlyq ándi úzdik oryndaǵany úshin David Charlin de marapattaldy. Ol baiqaý barysynda óz týyndysyn oryndady. Instagram arqyly daýys berý nátijesinde Qaraǵandydan kelgen Ansar Abdýrahman «Kórermender kózaiymy» júldesin aldy. Almaty qalasynyń ákimi atynan arnaiy syilyq qaraǵandylyq Ajar Ábdishevaǵa berildi. Bul syilyqqa 200 myń teńge kóleminde aqshalai syiaqy qosyldy. Erekshe diplomdarmen Ajar Ábdisheva, Mádi Nurbotaly jáne Qaýsar Bekbosyn marapattaldy. Erekshe ataqtarǵa ie bolǵan barlyq diplomanttarǵa 50 myń teńgeden syiaqy berildi.
Qazylar alqasy músheleri de nazardan tys qalmady. Medeý Arynbaevqa otandyq mádenietti damytýǵa qosqan úlesi úshin Murat Irǵaliev pen Aleksandr Ponomarev atyndaǵy arnaiy júlde tabystaldy.
«Jas Qanat. Balalar-2024» aiasynda jas mobilograftardyń konkýrsy ótti. Jeńimpazdar jańa smartfondar men firmalyq merchter utty. Al dástúrli sýret konkýrsyna elimizdiń túkpir-túkpirinen 206 jumys qatysyp, onyń 126-sy finalǵa ótti. Nátijesinde 3 laýreat jáne 11 nominatsiia boiynsha jeńimpazdar anyqtaldy. Jumystar shyǵarmashylyq oilaý, ózindik erekshelik, tús qanyqtyǵy, oryndalý sheberligi men ulttyq koloritti beineleý siiaqty kriteriiler boiynsha baǵalandy.
Dalanews ekojúiesi birneshe jyldan beri «Jas Qanat» baiqaýynyń aqparattyq demeýshisi bolyp keledi.
