Ystambul qalasynyń Bas prokýratýrasy 402 kúdiktini qamtıtyn sybaılas jemqorlyq isi boıynsha shamamen 3 900 betten turatyn aıyptaý qorytyndysyn ázirledi. Qujatqa sáıkes, Ystambuldyń eks-meri Ekrem Imamoǵlýǵa 828 jyldan 2 352 jylǵa deıingi túrme jazasy suralýy múmkin, dep habarlaıdy Dalanews.kz CNN TÜRK arnasyna silteme jasap.
Bas prokýror Aqyn Gúrlektiń málimetinshe, is boıynsha 143 qylmystyq epızod qarastyrylǵan. Olardyń ishinde 12 para alý, 7 zańsyz aqsha aınalymy jáne 7 alaıaqtyq epızod bar. Qazir 105 kúdikti qamaýda otyr.
Aıyptaý qorytyndysynda Imamoǵlý basqaratyn toptyń áreketi memleketke 24 mıllıon AQSH dollary jáne 160 mıllıard túrik lırasy (shamamen 3,8 mıllıard dollar) kóleminde zıan keltirgeni kórsetilgen.
Naýryz aıynda Ystambul ýnıversıteti Imamoǵlý men taǵy 27 adamnyń dıplomdaryn jaramsyz dep tanydy. Bul sheshim onyń Túrkıa prezıdenttigine qatysýyna kedergi bolady. Aıyptaý organdary dıplomdy jalǵan berý isi boıynsha oǵan shamamen 9 jyl túrme jazasy jáne saıası qyzmetpen aınalysýǵa tyıym salýdy surap otyr.
Imamoǵlý 2019 jyldan beri Ystambul meri qyzmetin atqaryp keledi. 2024 jyly qaıta saılanyp, bıliktegi partıa úmitkerine qaraǵanda shamamen 12% artyq daýys jınaǵan. Naýryz aıynan beri ol Sılıvrı qalasyndaǵy túrmede sybaılas jemqorlyq isi boıynsha qamaýda otyr. Terorızm deregi boıynsha ashylǵan ekinshi is boıynsha sot prokýratýranyń qamaýǵa alý ótinishin qabyldamaǵan.
Shilde aıynda sot Imamoǵlýdy bas prokýror Aqyn Gúrlekke jáne onyń otbasyna qoqan-loqy kórsetkeni úshin 1 jyl 8 aıǵa sottady. Sonymen qatar 2022 jyldyń jeltoqsanynda ol Saılaý komısıasy ókilderin qorlaǵany úshin 2 jyl 7,5 aıǵa sottalǵan jáne saıası qyzmetpen aınalysý quqyǵynan aıyrylǵan. Aıyptalýshynyń qorǵaýshysy bul sheshimge apelásıa berdi. Saıası qyzmetke tyıymnyń kúshine enýi úshin Joǵarǵy sottyń SIK ótinishin maquldaýy qajet. Partıa apelásıalyq sot sheshimin kútip otyr.
