Ferdaýsi mektebindegi jaǵdai turaqtaldy
A.Ferdaýsi atyndaǵy jalpy orta mektepte 700 oqýshy bilim alsa, sonyń 371-i qyz balasy. Olardyń barlyǵy derlik mektepke dini atribýttyq belgileri bar formamen kelip júrgen. Júieli jumystyń nátijesinde 4 qyrkúiek kúni bastaýysh synypta oqityn (1-4 synyptar) qyz balalardyń barlyǵy talapqa sáikes formaǵa kóshti. Al, joǵary synypta oqityn qyz balalardyń 198-i birińǵai mektep formasyn saqtap, sabaqqa qatysyp otyr. Sondai-aq, mektep formasyn saqtamaǵan 60 qyz balamen mamandar jumys júrgizýde.
Orta bilim berý uiymdary úshin mindetti mektep formasyna qoiylatyn talaptardy bekitý týraly QR Bilim jəne ǵylym ministriniń 2016 jylǵy 14 qańtardaǵy №26 buiryǵyn saqtaý týraly túsindirý jumystary turaqty túrde júrgizilgen.
Máseleni sheshý úshin aýdan ákimdigi jáne oblystyq bilim, ishki saiasat, otbasy, balalar jáne jastar isi jónindegi basqarmalarynyń qatysýymen arnaiy jumysshy top qurylyp, naqty is-shara jospary bekitildi. Toptyń quramyna oblystyq deńgeidegi quqyq qorǵaý organdarynyń qyzmetkerleri de qosyldy. A.Ferdaýsi atyndaǵy jalpy orta mektepte 3 qyrkúiekten bastap biryńǵai mektep formasyn saqtamaǵan oqýshylarǵa bilim uiasyna kirýge tyiym salyndy. Sondai-aq, 3 kún boiy mektepten qalǵan oqýshylardyń ata-analaryna aiyppul salý sharalary jasalyndy.
Narazylyq tanytqan aýyl turǵyndaryna jumysshy toptyń músheleri túsindirý jumystaryn jan-jaqty júrgizdi. Memlekettik organdar men dini birlestik mamandary da ata-analar qaýymy, aýyl bileri jəne ziialy qaýym ókilderimen birneshe jiyndar ótkizip, zaiyrly memlekettiń bilim uialaryndaǵy ortaq standarttardy saqtaý talaby túsindirildi. Arnaiy barǵan 40 psiholog maman muǵalimdermen jáne oqýshylardyń árbirimenjumys istep, zaiyrly eldegi eń basty qundylyq – memleket zańyna baǵyný ekenin aitty. Stresske qarsy jáne onyń aldyn alý boiynsha túsindirý jumystarymen treningter ótýde. Búginde oblystyq bilim basqarmasy men jergilikti ákimdik tarapynan áleýmettik jospar jasalyndy. Qyrkúiektiń 7-nen bastap oqýshylar sporttyq jáne mádeni is-sharalarǵa qatysady.
Aita keteiik, jańa oqý jyly qarsańynda A.Ferdaýsi atyndaǵy jalpy orta mektep ǵimaratynyń ashylý saltanaty ótti. Biyl respýblikalyq biýdjetten 600 oryndy bilim uiasyna 1 mlrd. 350 million teńge bólinip, sońǵy úlgidegi oqý orny salyndy.
Túrkistan oblystyq bilim basqarmasynyń baspasóz qyzmeti
